خيمه بالمصحف

الجمعة 06 أيلول 2019 127

خيمه بالمصحف
علي ابو عراق
 
سبحان السرى بنحرك
واخذ بيدك لگاع الطف
مشيت من الحمد قربان لاخر خيمه بالمصحف
يمعراجك جزه القوسين وأدنّه
الله بحرگة الصيوان سوّه لعينك الجنّه
مبحر والمنايه وياك تتعنّه
تدريبه السفر چتال بس گلبك ولا چنّه
 يا أول جرح يكبر اشما يعتك
يا أول خيم فوك الگلب تندك
يا أول ضعن يتفرهد اعله الحك
يا أول نحر يتبسّم لسيفه
يا أول جمر گد العشك ورّد
يبيبان الحزن ذيچ الولا تنسد
عطش دين الله وانته انطيت دمّك من برد فرضه
بطل صوت الأذان وضاع لو ما بالضمه اتوضّه
اذا چان الذبح يرضيك گلت هاك النحر وارضه
كبش خلّص ضنه ابراهيم وانته انطيت عبد الله
لا طير بحلم يفديه ولا مر الوحي اسم الله
ولا برد وسلام المر على خيامك
من بيهن لهب صلّى
ولا يبصر نظر يعگوب لو ماينسلب ثوبك
ولا هدهد نبي سليمان سافر بالضمه لصوبك
ثگل جنحه بحزن من شال مكتوبك
نزف دمّك على الگيعان منهه وخضرت تربه
جرح ينده جرح متعوب غربه تسولف لغربه
من گلب الخيم للماي چم نيشان متبدّي
من حضن الصدر للشوك چم صهيل متعدّي
بمتون الرمح قرأن ويندّي
من وجه الشمس للشيب حسنك غايره الوانه
چم عثرة نهر عطشان فوك شفاك ذبلانه
يحسين الجروح عليك شيلمهن
مثل ضعنك تبدن شوك هم احترگت اخيمهن