ذكريات

الجمعة 22 تشرين ثاني 2019 199

ذكريات
لطيف العامري
 
أصبع أصبع جان جفك جاي
وآنه بروحي شوغه
وباب سجني يخاف من خيط الضوه يوصله أليه
ّ شلون وصل جفك الجايبلي صوغه؟!!
وآنه أشوف بجفك أحلامي القديمه........
ذيج أحلام الطفوله....
وحسرة الثوب الجديد
ودمعة العيديه باول يوم عيد
العيد عدنه.......
مو مثل وجهك حلو
عدنه مرجاحة العيد خدود ثكلى
 
واللي يتمرجح دمع...........
وشفت جفك....
 
جنه كل اصبع نبع..
والعطش بينه.
شلون اسولفلك على سنين العطش؟؟؟!
الهور زنجر.....
والنهر نشفت لهاته......
والملح مابيه دغش
وانت يل جفك قضية...
شلون اورقلك همومي.......
ورقه ورقه
وليل ليل.....
وحيره بل جفك شباب
تعافه من ماشاف حيل
يصافح حرورة شبابه.....
شلون لو جفك يمر مطلع قصيده......
شلون أكملهه شعر.....!!!!!!!
 
وأقراهه لليردون شعري...
شلون أوصل للاريده!؟
وأنت جفك مره لو يخطف علينه
يعيدّ الماشاف عيده..
 
ولاتكلي البيت عيده......
آنه جاي أنزف شعر وهمومي  دمي
آنه مو بطران جاي أكتب قصيدة....
جفك مرايه شفت بيهه حياتي..وذكرياتي
وآنه هم شلون أحمل ذكريات!!!
كلهه خاكي تكول ساحة عرضات
تبتدي بفرضة وشعيره
وتنتهي بأرض الحرام
 
شويه خل استغفر ذنوبي بحضرتك ملت الغربان روحي
خل يحط مره الحمام...
وكافي أسمع (ياحسافه)
شويه من (حن وآنه أحن)ضوكني شهكه..
شويه مد جفك عليه
أشبكني
 
وعيونك اموت
بدفو الشبكه
وعيونك
أموت بدفو
الشبكه