كل صباح وياي أريدك ياعراق

الجمعة 13 كانون أول 2019 369

كل صباح وياي أريدك ياعراق
سعد صاحب
 
احبك يا وطني العزيز اكثر من عيون حبيبتي الجميلة ، والطريق يقودني الى ثراك الطاهر من دون ان ادري ، وكل عطر يفوح منك يسحرني بشذاه برغم
المسافات البعيدة  .
 
دون معنى الدنيا يا عيني بغيابك / ما رهم غيرك ابد للروح ثاني / ياما تطردني واظل واكف اتاني / يوم تفتح ذاك بابك / وانه ادري من الزغر مالي نصيب / انت تنظرلي غريب /  وانه اكولن يا حبيب / وانه اكولن سيدي وحضرة جنابك / يا وطن كلما تحاصرني بهذاك الليل غربة / يا جرح ينزف واحبه / يا عسل صافي مثل طعم المحبة / يا جسر دنيه الامل هاي الجديدة / دورت كل الشواطي وما لكيت اللي اريده / لن الذ مامش الذ من مي رضابك/ ما تسكرني قوارير النبيذ ولا شهد كل الاواني / بس يسكرني هواك وبس يدوخني شرابك / كل درب ياخذني ليك  / كل عطر لو هب يجي من بين اديك / ما يهمني شكد وكت مر اعلى روحي / المهم عندي اناطر للفجر ساهر عليك / المهم طول الدهر تبقى معاي / روحي بيدك للابد تعزف كمنجه / كلبي بيدك صار ناي / وانه هنيالي احبك بيك حد الموت هايم / وانه يسعدني اباوعلك حبيبي وانت نايم / اشبر بطولك وافصل جرحي للملكه بجايم / ما اهاب الكون كله / بس يبو اطباع العسل
وحدك اهابك.
  
تذكار
ذكراك في المنافي الغريبة دارات امنة نلوذ فيها من القلق ، وحفنة من ترابك الغالي اغلى من كل الهدايا ، واعز تذكار يرافق الروح
حد الممات  . 
 
انت نفسي واغلى من نفسي عليه / انت كلبي شلون كلبي / صار تالي باخر المشوار ضدي ومو اليه / انت حبي شلون حبي/ عاف كل ذيج المحبة وخان بيه / انت ودي شلون ودي / ما يحن لدموع عيني الخضرت شجرة باديه / لا تروح بعيد وارجع يا مناي / كل صباح وياي اريدك / واشتهيك طيور تخفك من يمر موحش مساي / وانت يا سجن الازوره تصير جاري / انت بالغربة صرت بيبان داري / وانه اعز تذكار عندي / صورتك واشعار مجنونة وعطر يملي ثيابك.