لاجنك

الثلاثاء 04 شباط 2020 238

لاجنك
حمود حسين كعيد
 
 
لاجنك تحط للگاع ...
ولا جنك تهب وتروح للعالي ,
خيالك طوله يبرالي ...
ذبحني مشابر اچدامك ...
اشرك انت تتبعني ,
اشمل انت تدرني ...
يطول بطول جدمك مابره جدامي!
وعلى مهاده هذيچ وهاي ...
شبرين وفتر واگصر ,
انتدانه وحالك يبرد بحالي!
انتباعد يواطيني الحزن وتصير چتالي ..
يا اول امل دنياي ,
شمر مواگحك وياي من تالي !
يتالي وعيدو عيدين 
عذالي !
وانه بعشگك صرت لهمومهم جالي...
تهايل وانهدم من روجهم حالي,
تمنيت الوگت يمحيك من بالي...
تمنيت وبعد ما عبرت الچلمه.
لگيتك واگف گبالي !
وتظل عيوني لعيونك ...
ادورن دايرك وافتر واريد اندل ,
ترف روحك نوت ياصوب ما اندل !
اثاريني بحلم ذاك اليريد يشوف..
وجه النار بابه منين ما يندل ...
يطاوع گلبك ويجذب ,
يغازل گلبي بالضدين ... 
گصيت بگلبي ما ترحم ,
فتر غازلك وارحم ,
عذب طعم الفرح يازين ,
لو نرهم ولا نرهم !
واعت بروحي وتعتني ...
واجيك اتواگح ويه الغيظ ,
وامد چفي اعلى سباحك تعت چفي...
وتهيل بزيبك ترابك على متوني!!!