سر الخلود

السبت 12 أيلول 2020 142

سر الخلود
 علي تايه
 
ردت أرسمك..
شفتك أكبر من مجره 
وكون ماتحويك لوحه 
وردت اكتبك...
كل حرف يم هيبتك 
يزغر وأمسحه 
منهو گبلك ...          
يبچي عالناس التذبحه 
ومنهو گبلك ....
اترخصت منه السيوف 
وتمر خجلانه اعله جرحه 
انته يا أعرق حضاره انكتبت
وأعظم مسله 
انته يا دنية محبه وكبرياء 
الكون كله 
الهمني فكرك....
حتى احلق فوگ لعنان السماء 
وإشتل بوجداني لاءك 
خاطر تخضر إباء 
وخاطر يموت الرياء 
واجرع الكاس الشربته 
حتى اموتن موتة المتيقن 
بذاك الوجود 
وأدعي گلگامش واگله 
مر على الطف كِونك إتدور 
على سر الخلود 
الخلود...
من تطش دمك على الصحراء ويخضر مناير 
الخلود...
اليصنع بكل يوم وبكل وقت وبكل لحظه ثائر 
الخلود....
اليتخزل ماضي الزمان ويخطف من الدنيا باچر 
الخلود...
العاف ملك الدنيا واتربع على عروش الضماير 
الخلود.. 
لمن تلوچ الصبر وتصوغه لاجل 
الناس فرحه
وصرختك موتى الضماير بيها تصحه 
واني كل هذا وأحسّن لسه ما 
قاري بكتابك سطر من مليون صفحه 
وشلون أرسمك..
وانته أكبر من مجره وكون ماتحويك لوحه 
وشلون اكتبك...
وكل حرف يم هيبتك يزغز وأمسحه