يا بحر الكلوب البيض

الأحد 01 تشرين ثاني 2020 298

يا  بحر الكلوب البيض

  حمود حسين كعيد

 
 
اريد اوصل ولا اوصل
يلن مشلول مو تعبان  
بعيد وشوفتك ..منوه 
وانه الحيران     
اجيت ازحف على ازنودي
زحف رضعان
اكابر والنزف خطلك على تراب 
الجزيره الف نيشان
من وادي لعد وادي 
صوتي يضيع بالوديان
صفيت انه شبيه الميت
بين الشوك والتربان 
وادماني صفير الريح
ومناثر عليه ارمالها الكثبان 
ونشدت العود والعود 
ورمال الجزيره وخطوة الغزلان                  
نشدته وكال ما خله اشاره
بعود تحجيك على العنوان
دلم روحك على اجروحك
وذب الجان كله بروجه النسيان
تراك انته بجزيرة موت
بيهه الذيب لصفاحك ولك جوعان
 ولك يا طيب.. حتى الشوك
خضرله حلك ولسان 
وانته اخرس والوكت اخرس
وادور بصفنه الخرسان                                   
 ياخرسان مامش نور
وسط التيه يشمرني على السفان
ويا سفان... صفيت انه
مثل قطعة اثاث مكابل البيبان
يتجسس عليه الكاشي
والبرده وسمه الحيطان
واغبش واشوف اعيون
تاخذني وتردني وتكتب التبيان   
اغبش ولكه اجفوف
تكتل بالبلابل.. تبني للغربان وياغربان صيرتو الوطن تابوت
ينكل بالضحايا ومتعب الدفان
وانه الحلمان الاكي كلوب 
كبل وجوه.. للبلبل تصير اغصان
وانه الحلمان ارد اجناح
صار سنين تايه وبسمه البلدان                                                                                                                                 
يا وين انته لا فيضك زهك خلكه 
ولا جنحك اجاني مواكح الجنحان
يا وين انته بعدني وياك
ذاك انا لا بايع..... ولا ندمان
يابحر الكلوب البيض
كلبي لروجتك عطشان
اموتلك وارد احيه
ولاينكال عنك ظالم الوجدان
نظمت يوم 16 /12/ 1986 وعثر على مسودتها في 5 /7 /2020