بمناسبة مرور عام على فيروس كورونا

الاثنين 04 كانون ثاني 2021 178

 بمناسبة مرور عام على فيروس كورونا

 سعد صاحب

الشوارع فارغة وبس الفخاتي...
تلكط الحب من على اكتار الرصيف 
دون خوف ولا حذر من البنادق...
لنها تعلم بالجنح شالت بطايق,
كل بطاقة تكول مسموح العبور... 
حتى جيلات الجذب لاما تثور... 
كل وليف يسامر بنشوة الوليف!
لا زغارالتركض وراحت تنشها...
تشرب الماي العذب من النهر لحظة عطشها، والفحل توة اكتشف سر الجمال الشالته برفة رمشها،
تلعب براحة وسعادة...
بين اهلها وبين دارات العبادة،
صار ايام الخطر والموت كل ممنوع عشها، صار ريش اجناحها الزاهي كثيف!
طابت شما بيها من طعنات من ذيج الكسور...
ما بعد واحد يصيد,
ما بعد صياد ينصب للكطه الساهي كمين...
ما بعد واحد يجور،
لا ولا ايد الوكيحة التكطع اشكال الزهور, 
لا ولا يكدر يلوح الطير حاقد,
مهما جان يعيش حالات التكبر والغرور...
يغسل اجفوفه ويعاود...
هلبت يحس بالجذب مرة نظيف!
ما بعد واحد يهز روحة الحنين...
ما بعد واحد يمر خطار لحبابة ويزور,
لا ولا ايد التدك بيبان دور...
بس سرب هاي العصافير اليدور,
بس يلوح اهناك بالساحة شبح شرطي المرور...
غاد يتمشى عريف!!