فصل للخوف

الاثنين 29 آذار 2021 203

فصل للخوف
يجيني الصوت، 
واتمايل عرك..
دخان...
واتدورين بشفافي طعم بوسه 
على اضلوعي..
احسن بيج .. حنية كمر.. وافراش.
غني..
الدنيه غربة ناي..
«شبح ليك النظر يهواي واشرب 
تونس لا تظل مقهور واشرب» 
دغني.. وج دغني..
ياهو ظل يسوه ونسولف بيه..
غني..
هودرت كل السوالف..
والشماته الغركتني..
إلا جرحج..
وانتي روحي المابكت بيها مسافه ابلا رحيل..
ولا بعد جف اليلمها من تكع ويه الجكاره
أو تغرك ابصفنه..
أو ترد...
مطلوبه جيل..
انتي روحي..
اتمرجحي بعيون كلمن يشتهيج امرايه لجروحه،
أو عرس جذاب لليل الطويل..
غني 
لدروبي العفتها اوعندي بيهه اكبور واعيوني الشواهيد أو نسيت..
ما اريد احجي..
الحرف جزوه..
يذلني الخوف..
غني...
انه بعيونج «عراق» 
ابكل خسارة عمري ابجي أو مادريت.
 
1970