مليت المدينة

الأحد 18 تموز 2021 166

مليت المدينة
  يوسف المحمداوي
 
مليت المدينة واشتهيت الشط
يبطه كون اصيرن والعب وي البط
مشتاق اعلى هوري وبزة العاگول
ما ريدن كراسي البيهن اتحنط
مليت المدينه وحيلة الصحبان
مشتاق الصديج العلجرح ينحط
ياعطر الكصب يشفي الجرح لو فاح
والجرح المدينه ما نفع مخيط
اشتهت روحي يروحي طابك وكطان 
الياكلهن هذن طول العمر ينشط 
طفلهم من يجي شو بجيته موال
ومو بحبال لا بالكصب يتكمط
حافي اعلى الجرف ومشابك ويالطين
يمن طينك عوافي للذي يفحط
رنة معضدك لو عزف موسيقار
حگه لو سمعها اگليبنه شعوط
يارگصة تراچي بمسرح الخدين
گلي بضحتك ربي شمصايب حط
گذله مسعده وبللها ماي الهور
يسوه (الفير) ليط الكصب لو مشط
من الارض حگها لو سمانه تغار
غم رايي شجاله وبالگمر فرط
خلني بگرب لوذة عاشگ ومعشوگ
لگيت الهور گبلي جاي يتسنط
ياشبگه نقاوة بلا غزل مشروط
البلبل عالشجر ما يوم يتشرط