احبك يا ابو فاضل

الأحد 05 أيلول 2021 208

احبك يا ابو فاضل
  ايهاب المالكي
 
احبك يا ابو فاضل موقف وروح
احب بيك الجروح الترفض تهيد
احب ايدك بلحظه شمرت الماي
واحس لوحات صبرك بيها تجريد
احب وگفت ضميرك والسهم جاي
احب هذا التزامك بالمواعيد
عشت كل عمري اشوفك عالنهر شاب
هو انت ابو فاضل يا مواليد
اشوفك عالنهر بس انت عطشان
رمضان امنياتك والنهر عيد
يا لمطلع قيم من فكره الماي
كأنك بالمواقف گاعد اتصيد
من الماي استشفينه الوفه البيك
ومن بعدك عرفنه الماي شيفيد
على حافر جوادك يصعد الروح
يتشلبك جربتك مدري شيريد
وتمد ايدك عطف لكن عطش لا
لا انت ابو فاضل ابن اجاويد
الك لو لشمس ذاك الهوه الحار
منو بيكم بجرحه احرورته تزيد
ادخل باسمك احتار اطلع منين
طرق ممشى امنياتك بيها تعقيد
الله ياابو فاضل وانت مجروح
جنت واگف بطولك عالنهر حيد
لهسه الماي من انجيب طاريك
تتبريد اجروفه وروجته تبيد
سرايه اتجر سرايه تموت جواك
اثاري الموت ياعباس تعويد
احب ثنيت ركبتك وانت عالماي
من گلك اشربني وگتله مااريد
احبك وانت بالطف ماردت خال
احبك وانت تشطب عالتقاليد
احب ثلثينك الطلعن عالحسين
واحس بخوتك عباس تجديد
احبك ياابو فاضل احبك ياابو فاضل
احبك ياابو فاضل حب معنات
مثل حب المنابر للرواديد!