ذكر حسين

الخميس 16 أيلول 2021 565

 ذكر حسين
   عادل العرداوي
 
ظل خالد مع التاريخ ذكر حسين وانصاره
اشما طال الزمن ويدور ابحبه البشر تتباره..
******
حگهه الناس تتباره ابحب احسين تتباهه
مثال حسين صار الهه، ومشعل نور ضواهه
وصرخة حگ على الباطل انقرت ونعرف معناهه
عبدهه بشريف الدم وللحگ صارت ابشاره
ظل خالد مع التاريخ ذكر حسين وانصاره
*****
ابشارة فجر حريه وشعت ضوت الايام 
كشفت زيف حكم الجور، وفضحت طغمة الظلام 
دم احسين صار اعلان وشعار وراية للاسلام
يتجدد فرض حبه، نهر ويفيض تياره..
ظل خالد مع التاريخ، ذكر حسين وانصاره..
*****
حي حسين حي صيته، حي اللي يحب حسين
سراط المستقيم حسين، نعبر بيه على الصوبين
وسيلتنا وقضيتنا حيه وباقيه بكل حين 
ومن حگ (غاندي) يفخر بيهه وبعده (جيفاره)
ظل خالد مع التاريخ، ذكر حسين وانصاره..
*****
احيي ثورة الاحرار الصارت رمز حريه
وكل البشر تعرفهه، ابذاكرة الزمن حيه
لا للذل ولا التسليم، لاصنام العبوديه 
وگال حسين چلمة (لا)، ولاء احسين بتاره
ظل خالد مع التاريخ ذكر حسين وانصاره..
*****
حي الله الشهيد حسين، الخالد بالزمن نبراس 
تشهد (كربلا) يومه البگه لكل البشر مقياس 
هذا حسين قدوتنا، نذكره ونذكر العباس 
نموذج للوفه اصبح البي تفتخر زواره
ظل خالد مع التاريخ ذكر حسين وانصاره
*****
نتذكر الطف اليوم، ومنها ناخذ العبره
دم حسين اروه الگاع واخضرت الف شجره 
مشتاگين، ملهوفين، نوصل نلتجي بگبره
ومنه نستمد طاقه، وعزيمه وقوه جباره
ظل خالد مع التاريخ.. ذكر حسين وانصارة..