احمد الساري

اختنكت ابصدري السوالف ،

احجايه من تطلع تهد بنار كبره،

وتحرك اضفاف الشفايف !

الصنطه ببيوت المدينه،

 تناثرت وهواس والعالم خرس ؟ 

ريحة البارود؛

 تتوضه  ابسوالفنه ،

 وتصلي بجامع الريه  وتكفر بالنفس ؟

يانسيم الخاتل ابكذلة قصر،، كل هالسنين،

 اطلع وسير عله ازلوف الصرايف

التمت بصدري الجروح

 وخلفت  بعيوني صفنات ووطن ذابل خضاره ؟

اتفصل ابنبرات صوتي؛

 الناي يعزف ياعراق..ياعراق..

 المستحه ابكيعان راسي،

 يخضر بكل خطوه ذله ؟

ابراسي يفتر حمورابي

 يدور اثار ومسله !

روج دنيانه امس بي امنينه؛

 وغيرة السفان سكرانه وغفت والروج اكل صدر السفينه 

غركت احلام الزغار،

 بشارع اعيون المدينه 

ارتوه من اركاد بسمتنه بغدر جف السياسه 

الشعب هيبة نخل مايحني

راسه !!

يالخذيتوا العافيه امن اكتاب تاريخ العراق؛ 

وعالكيتوا  اعمارنه  بحلك الخريف وذبلت وطاح الامل طيحة  فقير ابباب تاجر !!

تشوهت كاع السنين،،،

 بدمنه ونصبغت مكابر !

كثر الجيات عزرائيل،،،

 عاشكنه ويحب عطر المناحر !

ياعراق وعطر دم نحرك،

 يفوح ونسم ابراس الخناجر 

ياوطن غيرلي اسمك،،،

 بلكي جف الموت مايغدرنه

باجر