شاعر في كتاب
ثقافة شعبية
2021/11/14
![...](/uploads/posts/alsabaah-99676.jpg)
+A
-A
ذوالفقار يوسف
بين الترجمة والتخييل، وضعنا انفسنا تحت مجهر المسؤولية، تلك المهمة التي تـُعرف الكلمة ومن يكتبها، ولضرورة اعطاء اهمية حقيقية لمن يكتب ولما كتب، آثرنا أن نعطي للكتاب حقه في ملفاتنا المتعددة، فقد كنا قبل ذلك نكتب عن الشاعر، ومشاعره، وتوجهات انطلاقاته في عالم الشعر، اما الان فقد صار لزاماً أن نجعله ينبثق عبر اغلفة كتبه ومؤلفاته، لتكون صفحة ثقافة شعبية لهذا العدد تحاور {الانيس} قبل اي احد آخر.
نطل اليوم على قراء صفحتنا بتجربة جديدة - شاعر في كتاب - لنفتتحها بإعلان الوفاء لواحد من معلمينا في الشعر والصحافة الراحل جمعة الحلفي.
إن (عطر الغايب) هو كتاب شعري تضمن مجمل إصدارات الشاعر (ساعة ويذبل الزيتون، مليت، عطر الغايب) وقد انتخبنا هذه النماذج الشعرية منها لأننا والقراء ايضا نعرف بغياب سياسة توزيع الكتاب العراقي التي بقيت ليومنا من دون حلول حاسمة.
دفو
ردتك شوية دفو
لاخر ايامي
ردتك لبردي جمر
ردتك تعاودني مره!
تكسر الوحشه علي
وتشيل وياي الحمل
كثرن الطعنات يبن الناس
وگليبي طفل
............................
عطر الغايب
تركت عندك كل ما يدل علي ..
بما في ذلك مايدل عليك
عطرك اسمك
خصرك العنوان ، والتيجان صرتك
چنة ابخور وشمع وانه درويش بحضرتك
حسنك؟
حسنك يتلوه صلاتي ونومي حيره
مرايه اشوفن بيك عمري
مدري انته الجنت اشوفك
مدري هذياني اليرسمك؟
مرايه حزنك
بيك لو بيه الالم ؟
سيفي لو سيفك طعني
وسأل دمك؟
مرسوم من طوفان عمري
شمحي منك؟
شرسم بفضة عذابي ولوح عمري
حچايه منك!
شكتب بدفتر غيابك؟
طولك؟
طولك مثاوب مستحه.. وجذاب نومك.
من اجيسك
تنفرط حبات روحي عله الچراچف
شلون الم روحي والمك؟
شلون بيه .. شلون بيك؟
شلون افرط روحي يمك
وحبه حبه من ارد اضمك؟
زيبك مراية لهاتك
حاضر وغايب واشمك
مرايه حزنك واشتكيلك
وانته منك تشتكيني
ياهو بينه اليشكي منك؟
*دمشق حزيران / 1999
............................
المربع
اشك بچفوف اديه وما اشك بيك
واغار اعليك يبيض غيرة النسوان
اشلون اجمع وافرزن هاي من هاي
وانه بحبك فلا خليت ميزان؟
*
افز من نومتي خاف انته سهران
وانومك ع الرمش واسهر للاذان
يخصرك مستحه وطولك مواويل
لضوگك من لهاتك واظل سكران!
*
اخلص سنيني لعيونك مواعيد
واعيد بيك كل يوم بالف عيد
تگلي جيس خصري وبوسني هناك
هو انته عندك خصر ينجاس بالايد؟
* اللاذقية 1995
...................
وين أوديك؟
ما اعددت نفسي لهذا ابدا
وين اوديك؟
چنهه ليلة عيد جيتك ..
چنهه صبحية عرايس
رنة هاون من ابعيد
تلوهني العشگ .. وتلوهت بيك
چا وين اوديك؟
وين اوديك ومسافة ليل عمري
وانته الف نهار يمرح بيك
فريضة صوم عشگك
وانه صايم
چا يمته اعيد بيك؟
وين اوديك ...
يل همزة وصل خصرك
يل جمارنا يغار ويباريك
اچيت بغفلة الأيام
وين الگه عمر وسنين تفديك
چا وين اوديك؟
وين اوديك ...
وانته غيمة مساحه وشيمة احباب
وانه خشبة باب
الله ..
الله يا حيرتي
شگد بيها روحي حزن واشگد فرح بيك
چا وين اوديك؟
وين اوديك، وأنه شباچ وحچي
وانته خواف وتحاسب ع الكلام
اطمئن ماراح اگل للناس احبك
بس راح اگلهم
انه احبك والإمام!
*اللاذقية 1995
..................
أبواب
تگدر تدك الباب
الباب، لوح الخشب
مصبوغ ومدردغ وملون وجذاب
بس .. ما يرد الباب
ولو ما اسمعك تدگ
مايتفتح لك باب
*
بابك منقط شذر مرسومه بي نجمات
بالازرگ اسمك، تحت، مكتوب بالدمعات
وتحت التحت، رزته، مديوفه باللذات
بابك مناطر فرح موعود بالغياب
حاميك چف الحسد مرسوم فوگ الباب
*
بابك مزهر ورد طالع نده بعتبته
وببابي نابت عطش من عروته لرزته
ريحة الحضره ببابك والحمدو والتسبيح
بابك يجيب الفرح... وبابي يجيب الريح
*
بابك دفو بالشته وبالصيف جرة مي
بساط العصر بابك ومغطه بالفي
متروس بابي سهر وبابك ينام العصر
بابك منمنم خرز ومطرز وغافي
بارد هوى عتبتي وبابك ندى ودافي
*
بابك امراية عرس تتمرى بيه الناس
مديوف باحنه ومعرش بياس
بي آية الكرسي والحمدو والخناس
دگات بابك غير ..وبابي اله دگات
بابي تدگه الريح ..وبابك تدگه الناس
*
بابك زغير وحلو مقفول ومنده
يسبح بمي الورد بالفتحه والسده
ناطرت بابك عمر، شو طالت المده؟
بابي مشرع دوم .. محد يجي يرده
*
بابك جناح وهوى يودي ويجيب احباب
وبابي مبسمر صبر يتنطر الغياب
مليان بابك حچي ومليان بابي اعتاب
.....................
حالة عامة
لبس حزنه.. وتيمم بالشهاده وفارگ البيت
تتبعه امه بصلاة لعتبة الباب
تلفت بالدرب وتحاشى العيون
ولم بعضه اعله بعضه وغاب
يبني ...
يبني اعله المحن صبر اليحبون
يكاوون الجرح عن لا يزلون
نزع حزنه .. وتيمم باامحبه وفارگ الروح
وتذكر طيبة أمه واهله والناس
وزهى بطبعه وصداقاته وصبر زاد
وقره تاريخ همه يشيب الرأس
وقره حزنه اعله كل حيطان بغداد
يبني....
يبني الناس بيهه الزين والشين
بيهم يشتري بدمه الصداقات
وبيهم يشتري بدمك نياشين
نزع گلبه .. وتيمم بالصداقه وشرع العين
وابحر بالحلم يتمرى الأيام
ولگه بحلمه محبة الناس سچين
الوفي تحده وتگص البلوفه ايلين
ولگه بحلمه الوطن لو عزت العين
تمطرله السمه ويخضر بساتين
وتخضرله الخلايا بطارف الچف
وتطگ دجله وترويله البساتين
يبني....
يبني المايشد الناس ع الحيل
بكل ثگله ويخف باول السيل
*بغداد ١٩٧٩
...................
فاتحة المحبة
البارحه ... بالليل
گبل ماينسى الگمر ضوياته وانجومه
گبل وجه الصبح بشوي
دگ...دگ
دگ بابي العراق بهيد
افتحت باب الگلب ...اهلا
اهلا ياعراق!
اهلا...وين دجله .. والنخل
و بيوتنا الحلوه
بچه ...
بچه بروحي العراق وسكتته اهمومه
وگعدني البجي من النوم
لني بغربتي البس المنفى هدوم
هوه اهناك ...وانه هناه
شيجيب العراق
واگعد ابچي وياه
*دمشق 1996
قالوا فيه:
ريسان الخزعلي:
عطـــر الغايب توظيف حسي وتخاطري في الوقت ذاته.
نبيل سليمان:
لقد أضاف جمعة الحلفي بديوان (عطر الغايب) ومن قبل بديوان (مليت) علامة فارقة.
نعيم شريف:
لعل (عطر الغايب) بحسها التجديدي الواضح تشكل إضافة مهمة لتراث القصيدة الشعبية العراقية.
ابراهيم الساعدي:
يؤسس الحلفي في مجموعته الجديدة، لكتابة شعبية عراقية - عربية.
كريم جثير:
شاعر بعذوبة الأرض التي اورثته كل هذا الحنين.
كاظم غيلان:
الحلفي بداية جرح تعطر بالغياب.
منذر زكي:
ابتعد عن التجارة، ولكنه أكرم الجميع بابداعه.
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة