الراحل جمعة الحلفي
شكد غفت روحي اعله برد الطين؟
ياخذهه الهوى مندايه
وترجع للهوى مندايه
تنزف للشجر ويخضر الزيتون
ياساس الحزن بالروح.. خضر ياحزن زيتون
وانذر كل غصن للدنيا، للإنسان
وانزف كل فرح يامنيع الأشجار
وانزع كل قهر مربيك.. مر بيه
واضحك للجرح.. للريح.. للأزهار
للنجمه الربيعيه
شكد غفت روحي اعله برد الطين؟
يطك بيه الحزن والتم
يطك بيه الفرح والتم
اذوب من الغنه.. ياربح طاريك
يذوب كل قهر بيه
ينديني،
يغسل كل جرح بيه
يخاويني
يفزز كل لحن بيه
يغنيني سهار الليل تجليبه وابوذيه
وأمر بالناس، بالبارات، بالشارع
واذوب من الغنه وللكاع اغني الماي
اسيل بكل سواجي الناس،
اجدد كل سواجي الناس
افيض بكل سواجي الناس
واسهر للفجر، للصبح، للاذان..ليليه
