متانيه ،،
وما مرني طيفك
گمت اشد عيني اعله بيبان الليالي وأنتظرتك ،،
كل صبح ضحكات ورده
العيد إجاني ،،
وثوبي المطرزته بدموع انتظارك
بل جفن كلساعه اشده
متانيه ،، وبالراس طفله
تريد عيدية حضن
تريد شبگة روح بيها ،،
ابروده لإيامي المضن
وباوعت للعيد أجاني وبيده صوره
مزخرفه بلون الشمس
بيده صوره وشايله بچفها شهيد
ابثالث ايّام العرس
( يا بلدي المملوء بـ الدم )
اشتهيتك عافيه ،،
وجرحك عدم
اشتهيتك غبشة الزوراء ،،
من اتفل شعرها
وتنثر بكل الحدايق
سالفه وضحكة شعب
اشتهيتك راحة الله
وما ردت منك تعب
طار بيّه ،،
أجناح ليل الغربه طفله
وحط على اشبابيچ اهلنه
وچنت اظن لمّن أمر اشتم ورد بالمزهريه
ما اشم ونـه اعله ونـه
