عمر مشمش
ثقافة شعبية
2019/09/27
![...](/uploads/posts/alsabaah-19637.jpg)
+A
-A
حمود حسين كعيد
بعدهه شجرة البروح
تمطر طيب من طيبة سواجيهه
بعدها تواكح الايام
كلبي من الأمس لليوم يرويهه
رواهه وتوج المريود
نضج باغصانهه وللكاع يحنيهه
حناهه وغزلت الماشين
خافت من هوه الماشي يحويهه
تعال وشوف كهرب وبظلام الليل
يا لون الثمر بيهه
تعال وضوك مشمشهه الدلع بالعود
ترى المشمش كصيره أيامه تدريهه
دهاك اغصانهه تناديك
تريد أنفاس من عدك تدفيهه
سكرانه وما صحت للحين
وظل كلبك كلبهه وانته حاديهه
حديت وما دريت شلون
افرزن دمي من دمك ونسيهه
كلتهه ولكيتك كل البكلي
وبكلي تفرع دوم ماضيهه
رد... ولا تغيض جروح
تره جروحي عزيزه ولا تبجيهه
رد.. توضه وبدمي
وصلاتك بالكلب يا ولك صليهه
لهب دنياك جاس العود
وصل سباحهه الغافي بشواطيهه
صارلهه خلك منشار
بعد هوزه ويصير العالي ناصيهه
بعدهي تفوج حد الشوف
ما باست جذرهه وطاح عاليهه
بعدهي موالفه الجنحان
وركه بعودهه ولساع تحييهه
احييهه بمعشر محبين
وخذهه هناك للسبعين وديهه
ركصلها الشوارع عود
وامطر بالفرح يا وتر ورويهه
حلمانه تشوف العيد
تدري العيد صار سنين ناسيهه
لا احمر ولا أخضر ولا حتى
النساه اللون ينشاف علا شاطيهه
لابسهه الظلام من الجدم للهام
خضر بالمسامه وكام يدميهه
ولك يا عود كعدلهه ابو نواس
خله يكوم من نومه ويواسيهه
يواسيهه بقصيدة شوك
وانته اعزف صبه وبالروح غنيهه
كفر بيها الحزن يا هيه
وصار الهه جلد وبحره ياذيهه
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة