عصر العبودية
ثقافة شعبية
2020/03/03
+A
-A
حمود حسين گعيد
بُعدك نار لاجن نار
نار هيه بلا اثر فوك الجلد
لا حركت ثياب العلي
ولاتشم دخانهه انفاس التود
بالصدر موكد لهبها
بريتي هيه ويه النفس تعله وترد
وانته انفاسك مطافي
شلون اعوفك وابتعد
ثابت وكلي يكلك
هات كاسك وابقى يمي للابد
ثابت وعيني تشوفك
من وره الشباج بالبرده تسد
لا يا ولك.. عصر العبوديه انتهى
وبس گلبي صايرلك عبد
لا يا ولك.. حلمان وتودد الك
حسبالي وياك أنسعد
وحظرت للملكه روحي
وهم لگيتك طيف عني ومبتعد
ودارت بروحي الدواير
والصبرلاگاني بذنوبك يعد
وقفلت بيبان شوگي
ومادريتك صوت وبدمي تمد
باسني بجلمه وتعده
وگام بجروحي يشد
ايا ناعم سمار وبيك لوله
شويه أحر من البرد
انه على مودك صرت منوال حايج
مره اروحن.. مره ارد
اليوم ادك روحي على بابك
توز حيلي.. وما أرد
اليوم اشك جرحي
على طوله وبيه اهد
باليمنه جايبلك منيتي
وباليسره جايبلك ورد
يو اشم انفاس هيلك والسعد
يو تهب جناز بيه
وعل الگبر تقره الحمد
