(ذنوب العطش)

ثقافة شعبية 2020/05/03
...

عبدالله الطليباوي
عبد كافي تشوف الناس بعيونك
عبد لتصدك اليحجون مو كلهم يحبونك..
ومن انويت عالغربه علينا شكالت ظنونك..
ولاجنك هذاك انت..
شكثر بعد الدروب مغير بلونك..
شمس مغرب تمر بصفنة الشباج . 
واهلك ما يعرفونك ..
 
عبد يا روح الولايه..
يهالماشي زلف لاخر محطة شيب 
يمته ترد يمن باب اهلك مرايه..
دورنا شكثر بجيوب قمصانك..
عجب ما تارك لصاحبتك حجايه..
 
يم دارك مشينه سلال ما دلت عناكيدك..
سولف نيتك للماي لا تذبل مواعيدك..
 
توصلنا السوالف حد طواريك سفينة راي. 
ما عبرت لذاك الصوب...
وشمس ذكراك تاخذنا لسمه عيونك..
ونشوفك ذاك لا مريتنه نجمه
 ولا بسطوح ديرتنا اتبده غروب..
عبد يمته تصلي الماي..
وذنوب العطش منها تمل واتوب..
 
عبد بعده الضوه يتكذل بطاريك..
يا شباج يم كل حايط انتانيك..
وينك يا فرض جيه شوكت بيبانه تصليك..
يعزك من تشح وبموعد انلاكيك..
ويعزك ياحلم لما الصحو يبديك..
 
نلكاك شوكت ونضيع الحيره ..
عبد والما يمر بالناس 
ما تنفهم بالصفنه تصاويره. 
واظن طعم السفر نساك 
الما عاشك وطن يرهم بكل ديره..