فيان البغدادي
انت صوت 

وصم أذن كل ليل كاتلّه شمس

صوت 

كل بلبل مُعارض.. يخفگ بلّافتة جنحه

 ويكسر أبواب القفص من ينحبس

الرساله البيك شفّافه بحيث الما قراك ايشوف 

بحروفك عطش وجروح وارماح وسهام

وسيف يتلوّه برگبتك 

سالفه وضحكة شمر

الما قراك ايشوف

لازم تنذبح وتطيح گوّه وتسحگ الخيل اعله صدرك من تمر 

الما قراك 

بصفحة التاريخ سامع.. منذبح عطشان

 وچفوفه نهر يجري اعله طوله وما سگاك

 والقراك

قرايه سطحيه على الزنجيل

بس دگّــه لگاك

القراك

بحنجرة رادود 

راد يغنّي صوته من اشتهاك

حسين 

للفاهم قضيته بفلسفة معنى حُسين

الصاغهه الله

العطش يلگاه بشفافك خضار

ونحـرك المذبوح جنّـــة جُلّنار

ولاءك بنص دائرة سبعين الف ليــــل انبزغ منها النهار 

بطفّـــك اموّرث بخور أخيّـم ملىء الدنيا سمار

 والزّغار اتناثروا فرّاش وأحضانك ربيع منين ما شوفك ربيع

وحاضن بصدرك غصن زيتون

ومخضّر رضيع

وخضّر بجرحك فياي

الشمس وكحه وتبدي بطوسها احروره اعله شفتك 

وأنته بشفافك عطش رواله ماي