الإمام الحسين (ع) شعار أبدي لكل الفقراء
ثقافة شعبية
2021/08/22
![...](/uploads/posts/alsabaah-89259.jpg)
+A
-A
سعد صاحب
.......................
مر رأس الامام الحسين (ع) في الكثير من المدن العربية، وتوجد العديد من الدلائل المثبتة، على أن المرور كان واقعياً، وليس من صنع الخيال.
وين ما مريت ياسك
ياخذ الارواح بعطوره التهب للدوم فايح
وين ما مريت كاسك
من ندى الباري اليسح مليان طافح
وين ما مريت ناسك
آه صاحت فوك آه
وين ما مريت جرحك
يبتسم فرحان يضحك
حط اثر بعداك شاره
وين ما مريت صبحك
تارس الدنيه بضواه
وين ما مريت صرحك
ملحمة وتاريخ وشموس وقرابين وصلاة
والتخلف لا ابد ميفيد للتالي اعتذاره
وين ما مريت راسك
يلگه ذاك الشيح واكف بانتظاره
يلگه كل ذاك الشجر لابس خضاره
يلگه سرخس فوگ دربه
يلگه برسيم وشمندر
يلگه واحه من الشبت والبربران
مشاهد
هناك الكثير من الآثار الناطقة، والعديد من العلائم البارزة، هذه النقاط المشعة خلودا تسمى مشاهد، وما اكثرها في بلادنا الواسعة.
هذا مشهد ذاك مشهد
وين ما مريت مشهد
وين ما مريت لمه
والامام حسين فوگ الدور رسمه
والشريعه و گنطرتهه والسهام التملي جسمه
امي ما يصلح تگول
ما نسمي جاهل من البيت باسمه
ما نسمي زينب بهاي البنات
يوم شح الماي وتبره الفرات
ما بخل وتوضه ندري بماي دمه
كل حجر بالگاع يشهد
طاف ما بين السيوف بكل جداره
فوگ ذيج الرمضه شرغد
والطواف بحضرتك يحتاج عده
منهو طاف بدنيتك ما صاح شده
واليريد يطوف من گلبي الجريح اليوم يبده
وبطريقه يشوف اهل الكاظمية
وبطريقه يفوت يم الاعظمية
يوصل الاخر شبر من گاع مشهد
يرجع القنبر علي والطاطران
والحمام يطير من ذيچ الجداريه بترافه
شي يروح الشارع السعدون ممشه
شي يحط فوگ الجنود الراجعين من الحرب بالطيران
حدث شامل
اصبح استشهاد الامام الحسين (ع) حدثا تاريخيا شاملا، وصارت قضيته العادلة شعارا لكل الفقراء، يتجدد عبر الازمنة، وهتافا عاليا يقض مضاجع الظالمين.
راسك المگطوع عايش
توني شفته يصيح ما بين الشوارع
يهتف ويربك منام المسعدين
والمضاجع تبقى تهتز خوف بالليل المضاجع
بيرغ الحگ شالته چفوف المناضل
لافته تحوي امل كل الفلاليح التناطر
تضحك حروف الحچي البيهه عمر فوگ المناجل
ترتفع بچفوف عمال المصانع
والجروح البيك لسه شگد طريه
كل جرح يوم القيامه يصير مشعل
كل جرح يوم القيامه يصير مشتل
كل جرح يوم القيامة يصير صور
لو جرح مرات يبرد
لو ذكر ليل الظلم يبقى يفور
وانت اجمل راس عابر
كل تعصب كل جمود وطائفية
يل وصل جسمك تگطع فوگ ذيچ المشرفيه
والعجيب ترد عدل كلما تموت
دمك يدگ كل جرس خربان عاطل
تگعد بنص ليل مرعوبة القصور
من شبابيچ المنازل ما يمر خطار لحد
يدخل من الباب يدخل للبيوت
فوگ كل رف ينصب بالعيد مثل المزهرية
ما ترد واحد طلب منك سماح
ذاك راسك بين كل عيون ثاير
ميل نجدي وطيف من فضه توسد
امنيات وعيد وكتاب ومناشير وسلاح
يحضر بكل المحافل
يكتم الصرخة ويسولف عن الم هاي الجراح
والحنين الديرة احبابه الحنين
صار للمظلوم ثورة
صار للمجروح شميسه ومصابيح ومنار
والمگاريد اصبحت بحسين ثره
فوگ ذاك اللوح بالدم خط عبارات اليسار
وانتفض ضد الجهل ضد اليمين
من بعد ما صار دين الله غريب
من يمر خجلان بالشارع يفوت
من بعد ما صار دين الله يدورله اعلى دين
من بعد ما صار كل الكون اظلم
بس ذبح بس موت بس دار اتهدم
بس فساد وسوط يوجع
بس ضياع وبس قهر بس توهان
سبايا
تفتخر كل بقعة من الارض، بمقدم كل الرؤوس الطاهرة الشريفة، وبمرور موكب سبايا النساء العلويات، وان كان الموقف محزنا حد العويل.
درنه ما بين الشوارع
درنه من درب الدرب درنه سبايا
فرجه والوادم تباوع
واحنه من نسل النبي الطاهر نثايا
ريت لو محد يشوف ولا اجانه
لسه هاي سيوفكم تگطر دمانه
لسه هاي سيوفكم تمطر خطايه
ريت لو ذاك الدرب ما بي نظاره
ريت لو طر الركب وحشة صحارى
ريت لو يكسر قفل بابه السجين
صرنه مثل اولاد كابل
صرنه مثل الروم ما بين القوافل
حيف لا ناصر ولا عدنه معين
طلعت مريه اجت تسال علينه
جابت وياهه ازر جابت مقانع
گالت انتن يا اسارى
احنه من آل النبي الطاهر محمد
احنه اهل بيت الحسين المات وحده
باس جرحه وفوگ گاع الطف تمدد
احنه ليل البارحه اعزاز بوطنه
احنه هذا اليوم بچفوف المخانيث الرعان
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة