علي الشباني 

دكيت باب السنه .. لن الدهر حاير 

لن الفرح ساجيه .. ومكسور طاري الماي، 

شالت العتبه عشب روحي 

ومشت للماي،

والماي حيل الشجر .. والنبع حيل الماي 

والفرح مابي طعم ..لو ماتصل بهداي 

بهداي ممشه النهر .. كبل المطر بهداي،

لكيتك تارس الماي - الحنين اليصعد ابروحي 

ويطك بكل مسامات الوطن 

دكيت باب الوطن .. لن الدفاتر خبز 

لن الوطن مطبعه .. ومكسور طاري الضوه 

ولنك فرح هاكثر يوم النسافر سوه 

وياك ... روحي شمس تمشي بشواطي الزمن 

دكيت باب الزمن 

لنك بخت مشتعل ويطوف بيك الوطن 

رسمتك جسر ع الموجه 

ويظل العبور، ابعيد 

سمعتك ليل جاس الدم 

وبروحي المسافه اتزيد 

اعاند والمسافة اتزيد 

اموتن والفصول اتعيد 

اهاجر ...

واحجي حزني أويا الرصيف 

للحدايق ..

لليغني الموت والثوره البعيده 

للشرف من يصعد ابروح القصيده 

للفرات..

يا حبيبي..

يلي مي شوفك فرات 

يلي كل هاجس رمح 

انت حي .. واني الممات

انت حي..

وانه قميصي امنقط ابدم الليالي الموحشات 

يا حبيبي..

انت حي.. وامي سكت حسها 

ابعذابات المنافي 

وما نزعت الصبر ببيوت الهواجس 

لا ... ولا دكيت باب الذل 

يبو مهره التجيس الشمس بالليل 

يماخذ كل نبع بالروح .. للسيل