{بغداد» عاصمة الحب الأبدية
ثقافة شعبية
2019/10/29
![...](/uploads/posts/alsabaah-21242.jpg)
+A
-A
ادب شعبي
عروس المدائن بغداد الانيقة ، مدينة الابداع والثقافة والتمدن والمعرفة ، يبقى العالم يرنو اليها من بعيد ، والجميع ينتظر منها التالق والازدهار ، والصعود في سلم المجد صوب السماوات الرحيبة .
بغداد تظل تكتب وتظل تقره / شغلت هاي الدنيه وصارت نور / صارت وسط العالم كمره / صارت مثل الذهب شما وج بالتنور / يصبح غالي ويصعد اكثر واكثر سعره / يا محبوبة كل الناس / يم القد المملوح المياس / يا ريحانة الله واجمل شتلة واطيب زهرة / هذا الليل الفاتن يبقى ينور / يبقى الدف يهلهل بالاعراس / تبقى تفوح الريحة الطيبة العطره / هاي شوارعنه المفتوحة بوجه الناس / شارع جنبد شارع جوري / شارع منه يهب الياس / شارع هيل وماي وعيد وخضره / شارع وكت الصيف وكل اشجاره الذبلت خضره / شارع يتلامع بلوري / شارع يتماوج فسفوري / شارع فوك الحايط جانت بيه تنام الشجره / شارع صاير تجوه الذيج التينه وذيج السدره / شارع ذهب وشارع فضه وشارع ماس / شارع ليل وكاس يرن بصحة كاس / شارع كتبوا حد الفجر الطالع تبقى السهرة / ياشمس الحب فوك سطوح العالم دوري / خلي الخيط الينزل يصبح نشره / شارع فوكه تحوم طيوري / شارع اكتب فوك الحيطان بطبشوري / تسلم من عيون الحاسد هاي السمره / والنواس الشايل بيده الجره / مو بس وحده اليشرب منهه ويطفي الجمره / كل الوادم تشرب من الكاس الخبره/ لن هذا الكاس البجفوفه / كاس الحب وكاس الود وكاس العشره / كاس الجامع من دم كل مجروح الكطره / دم المذبوح بكل هيمه / دم الرمان بكل غيمه / دم المصلوب بكل لوح وليد العذره / دم كل شاعر مخلص ثوري /دم حلاج الحنه جسوري / دم الشجر الينضح مثل البوري / دم الماي الصاير ازرك من كد حبر سطوري / دم الياس ودم الخوخ ودم
الزهره .
اخلاص
اروع ما في الوجود كتاب ، سواء كان شعرا او رواية او قصصا قصيرة ، فهو اوفى الاصدقاء ، لا يخونك في الشدة ولا يتخاذل في وقت الضيق .
اجمل ما بالدنيه كتاب / يتنقل بين الاحباب / يتنقل بجفوف الفقره / يتنقل من صدر الثاني / يا ريت اصبح لو ديواني / حتى توسد تالي الليل زنود الشكره / الفن وحده الكل هاي الوادم مخلاص / من كل هم وكل دوار وكل اوجاع / الفن وحده شراع / الفن وحده شموس تنور هاي الكاع / الفن وحده الروح المديوفه باخلاص / حقهه الناس العانت هذا اليوم تصيح / تحيا الشجره ويسقط يسقط عصف الريح / يحيا الشاعر يحيا الناقد يحيا القاص / يحيا اليطبع يحيا الينشر يحيا الباع / يحيا الشاري ورد للبيت ينود بهاي الصره / حتى تنور فكرك حتى تصير الالمع / لابد تشريلك علاكه وترجع / لابد تحفظ من كل قاص حجايه / لابد تاخذ من كل كاتب شذره / لابد تكتب من كل عالم وصفه / لابد تطبع من كل شاعر مقطع / لابد تدرخ من كل باحث فقره / لابد هاي الروح تعيش بعالم ثاني / لابد تفرح هاي الناس الجانت يوم تعاني / وانت الحاير بس بمد السفره / مو بس تاكل سمج وتفاح وعنجاص / مو بس يلحس طفلك بالمصاص / مو بس مرتك تاكل شلغم / مو بس تلبس اغلى سوار واحلى ثياب / مو بس تترس حوشك بالاطياب / مو بس تعرف وكت الراتب / مو بس تفتح وسط التمن اكبر حفره / لازم واحد يفهم / لازم واحد يعلم / لازم يشرح واحد بكتابين واكثر صدره .
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة