سعد صاحب
العطش الذي مر به الامام الحسين ( ع ) في تلك الظهيرة القائظة، لا يضاهيه اي ظمأ في الوجود، ولو صببنا كل ماء الفرات على رأسه الشريف اعتذارا، نبقى نشعر بالتقصير.
عطشتك يحسين عطشه/ عطشة العباس عطشة/ عطشة الاطفال عطشه/ عطشة النسوان عطشه/ كطرة المي جانت تعادل حياة/ بس بخل بيهه النذل طاغي الطغاة/ كال كلمن يوصل الشط بالسهام/ وي هبوب الريح من كل الجهات/ جيشنه الفوك النهر واكف يرشه/ الفرات يفيض بالدم/ ذاك نهر العلقمي كل مايه من دم/ حتى حمرة كل عروس اليوم من دم/ صار كل لون بدماك الليل لو مر يتغشه/ بس جريح الغربة طافت نص جبينه/ بس حزين الوحشة دارت بين عينه/ بس غريب الدمعة نامت فوك رمشه/ وانت يلمفجوع اكثرنه جميع/مو كفاية لو جبت بيدي الك شط الفرات/ فوك راسك طاسه طاسه بساع اطشه/والسؤال سنين ظل نفس السؤال/ مدري ليش شما ازورك ابقى خايف/ مدري ليش شما ازورك تنفضح كل السوالف/ مدري ليش بحضرتك تاخذني رعشه/ مدري ليش تصيب هذا الراس سكره/ مدري ليش تصيب هاي الناس غمره/ مدري ليش تصيب هاي الروح دهشة/ بس تظل حالة تخليني سعيد بلايه كل هم/ انه ادري الزارك ويفهم كلامك/ انه ادري الزارك ويعلم مقامك/ جنه مثل الزاير الله/ وطاف بجناح اعلى عرشه.
ثبات
الامام الحسين (ع) كان ديمقراطيا الى ابعد الحدود ، ولم يجبر اصحابه على البقاء معه، لكنهم اثروا الاستشهاد في سبيله، لاسيما الامام العباس (ع) الراسخ في المبدئية والشجاعة
والثبات .
لا ابد مو خوف من سالت على الوجنة الدموع/ بس هضم للنار تدخل راح كل هاي الجموع/ جان يخطب بيهم ويبجي الامام/كال مرخوص المحارب/ لو جفل من خوف لو رادالرجوع/ بس ابو الفضل البطل قدم حياته/ بس ابو الفضل البطل اعلن ثباته/ كال كل عمري فداك بكل خشوع/ كال يسعدني اطيحن بين جفينك قتيل/ كال تسعدني الشهادة بلا ندم وبلا عويل/ كال تسعدني الحتوف الصارت السان التراجم/ كال ايماني بقضيتك صار للخايف دعايم/ بيك ما تنقاس يا مولاي بحدود الشجاعة/ حاربتهم وانت ساجد/ حاربتهم وانت واكف/ حاربتهم وانت كاعد/ حاربتهم وانت طايح حاربتهم وانت نايم/ صاروا العدوان للغربان زاد/ صار خطار بارضكم ينزل الطير اليجوع/ صارت الاخبار توصل للنسور وللثعالب والجراد/ سفرة ممتده طويلة ومنضدة وكرسي خشب واشهى المطاعم/ صار واضح مو لغز هذا الكلام/ جيش اصحاب الفكر منصور لو حتى قليل/ جيش اصحاب الغدر مكسور وهواي الهزايم/ تنتصر انت عليهم وبجدارة/ لنك انت الفارس النشمي النبيل/همه كوم من القذارة/ همه كومه من الزبل ومن السيان/ همه كوم من العفن ومن اللمايم.
مودة
الإمام العباس (ع) كان شخصية متوازنة بشكل عجيب ، فهو من جانب يتصف بالقوة والبطولة، والدفاع عن القضية حد الشهادة، ومن جانب يفيض بالحب والمودة والحنان والرحمة.
أنت يا رمز الرواء ويا رمز اهل السقاية/ كلشي يبقى الخاطرك ينبع يسيل/ كلش يبقى بزندك المفتول هايم/ من يمر حافر جوادك فوك وادي/ حتى صخرات الجبال تفيض ماي/ حتى يكبر شوك روحي ويكبر بسرعة ودادي/ يكبر ويصبح حنيني/ شط سواجي من العسل شط سلسبيل/ شط ورد جوري وحمامات ورياحين وتمايم/ وانت ما ذبيت من ايدك ابد ذاك اللواء/ لكن سيوف الجناة المجرمين/ سيف منهن كص يمينك/ سيف منهن كص يسارك/ سيف منهن حز لحم اشرف معاصم/ وانت حتى بموتتك هيبة وجلال/ انت اول بالرجولة/ انت اول بالبطولة/ وانتاول بالمواقف وانت اول بالمكارم/ يا سجل من الشرف ومن الكمال/ يا وريث الكل تقاليد السماء/ لوله دمك ما يشع هذا السناء/ جانت امك مفخرة الكل النساء/ جان ابوك المرتضى بكل غيب عالم/ انت تركيبة عجيبة من الصفات/ انت جانب بيك قوة وملحمة ونخوة وحماس/ وانت جانب بيك رقة وطيف وشموع وتراحم.
