سلام الكريزي
شدوهن حبل وتخيل حجول
وتخيلت السلاسل بيدي معضد
ترجية اذني جف لمعتهه دم سوط
گَلايدهم خشب بالركبه ينشد
البگدي صدر لعبتها فوگاه
المرضرض بعد يا لعبه تنعد؟
البراسه دفو مادور النار
وانه بهدمي نار وصدري يجمد
ادور شبگة العشره انه باليل
باصابع تسعه حيل الشبگه تبرد
الكاطع اصبعك ما يگطع الراس
عدهم هاي سهله وشوف الازيد
عله جتافك گبل من اصعد بخوف
هسه اعله الهزل خلوني اصعد
تفصال الفراش بطولي مو سوط
يالمفصل السياط بعمري عالگد
انه بعمر الورد مو عمر الحبال
شجنيت ويه الشمر حته انه انشد
يجرحني النده اعله خدودي لو طاح
تخيل هسه چفهم عاشر الخد
وعاين ولتفت ولگاكم رماح
وصيحلكم ولكن ماكو كل رد
ماحكت شمسكم جرح المتون؟
فياي رماحكم وگفن لهن سد
ومسح بالجفن من كثر التراب
وكحلهن ملح وچفوفي مرود
