جان راسك مبتسم فوك الرمح فرحان يضحك
ثقافة شعبية
2020/10/04
![...](/uploads/posts/alsabaah-48495.jpg)
+A
-A
سعد صاحب
قال سهل بن سعد في الكامل: أول راس رأيته في الرؤوس، راس الامام العباس (ع) فخلت انه يضحك من شدة الاشراق والجمال.
يا مسيرة روس اهل البيت يا اعظم مسيرة/ هاي شوف خدودهم مثل الشموس الضاويات/شوف وجه القاتل الملعون جيرة/ والاسود شلون ما جانت اسود/ ترعب وهيه بوسط كاع البراري/ ترعب وهيه بقفص جانت اسيرة/ شوف رغم الانتصار العسكري تخاف الجناة/ بالشوارع طافوا براس البطل فوك القناة/ جانت الوديان من كثر الضوه اليسطع منيرة/ يدخل بيا نار كلمن راسك المهيوب شايل/ مو فجر فضي اليشع فوك الجداول/ هاي كلهه انوار صبحك/ جان
راسك يضوي فوك من الرمح مثل المشاعل/ جان راسك يبتسم فوك الرمح فرحان يضحك / جانت تقود المواكب زينب بشكل الاميرة/ حطت بكل عار جيلة/ شامخه وماهي ذليله/ حتى لو ساعة حرب وحده خذت منهه عشيرة/ احنه جا المن نربي/ ليك من تامر نلبي/ لو بعد رايد يربي/ هاك اخذ هاي القرابين الجثيرة .
أنوار
ذكر ملا حسن القزويني في رياض الاحزان: باب عظيمة وقد دخلت فيها الاعلام والطبول، قالوا الرأس يدخل من هذا الباب، وكانت الانوار تنبعث من هذه الرؤوس المباركة.
ذاك باب الخيزران الهسه يشهد/ هاكثر روس التمر هيهات تنعد/ تدري اصحاب المواقف بالعدد كلش قليلة/ والتخاف بكل زمن وادم غريره/ لكن الخالد يظل هذا القليل/ والملاحم تنكتب من دم ضحاياهه اليسيل/ والشهيد الاخر الدنيه تصل ريحة عبيره/ من يسح ذاك النده الناعس يفوح/ ينبت الريحان كلما كطره سالت والجروح/ تدري من عمر الليالي اليوم لحظتهه الاخيرة/ ما يهمهه تموت تسلم/ المهم جمارهه الحد الذبح ابيض ضميره/ شيمة الثاير يموت وعيب يندم/ ما يبالي الموت جان بطلقه خرسه/ مدري جان بسيف لو بحبال لو شعر الظفيرة/ لحظة السهله تفوت/ لحظة الصعبة تفوت/ كلشي يعبر والحياة شما تطول
تظل قصيرة/ واليظل ثابت قرارك/ واليظل ثابت مسارك/ واليظل ثابت صمودك ساعة الوحشة العسيرة/ وانت يا شمر الشمورة العلكت جم راس فوك المروحه/ لو صرت انت سفير المذبحة/ لو صرت انت سفير المشرحة/ هاي زينب بالصبر صارت سفيرة.
سماء
كان رأس الامام الحسين (ع) في هيبة عظيمة ونور يسطع، بلحية مدورة خالطها الشيب، مبتسما الى السماء، شاخصا ببصره نحو الافق .
جان اول راس داخل راس مولانه الحسين/ جان حلو الحاجبين/ جان محبوب الثغر ادعج العين/ جان رغم الموت يكطر بالحنين/ جان حسبالك كمر نور الجبين/ جان يضحك للسمه الحلوه الجميلة/ جانت تمد البصر عينه الكحيلة/ جان شاخص بالنظر صوب المغيب/ تلعب الريح بلحيته الخالطاهه شكد مشيب/ جان يشبه والده الصار الرسول الله وزيره/ والاجه بعده الرياحي شكد صبوح/ ذاك نورك يا علي الاكبر يلوح/ يترس الدنيه ضوايه/ تطرد من الكاع اشباح الظلام البربرية/ ذاك راسك احله من المزهرية/ جامعه القداح والجنبد سويه/ يا ابو الفضل وتخضر كاعنه الجدبه حدايق ياسمين/ من تمر وكت السفر صدفه اعلى سوح
/ من تمر مره خطف يوم اعلى ديره/ لو حبيب الاسدي/ يوم فوكه الخيل داست/ اهجس الحافر يدوس بروحي جان/ والرماح مثبتات بجسدي/ جان طاعن بالعمر فد نوب شايب/ لكن بدمه يجود بنص لهب ذيج الظهيره/ وانه لو مريت غبشه اعلى المزارع والحقول/ اسمع النرجس يكول/ عاش عباس الربط ويه الحسين بساعة المحنة مصيرة/ عاش عباس الحمل هاكد مراره/ واحنه جنه زغار نحلم بالزياره/ يا بخت من زارهه وطاف اعلى ذيج اقمارهه/ يا بخت من شافهه ومر اعلى ذيج ديارهه/ يا بخت من نام حدر اشجارهه/ يا بخت من دار يم احرارهه/ تدري ياهي مقبرة باب الصغيرة.
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة