أرشيف جريدة الصباح

الى شهيد الشباب بائع الشاي في ساحة الطيران

ثقافة شعبية 2021/01/30
...
+A -A

 جبار عودة الخطاط
 
 
1
(النار عالت بيك) 
يلمروض التعب ومدوْخ الحديثات
يادمعة عتب 
وامك سواجي العين
بسطيتك خريطة
وبيها قوري الچاي،، فرس
والنار عالت بيه
يصهل من يفور 
ويترس الساحات، دمّ إمهيّل
إيصب الحزن نهرين
يلطولك قصيدة ليل
أمك ناصرية نذرتك عرّيس
تنثر بالشعر والچاي عالصوبين
يا رويحة حلال
الماكسرها الضيم
يبن المستحة وحاضن جمر تشرين
 
2
(وصية أم) 
هيج
وإسچن
اصرخ، إصفن
وانشتل
بالصبخة خضّر
 
واشتعل
واطفي 
وتقدّم،،،، 
لا بعد أمّك تأخر! 
وإركز
إركز
واركد وفز
ونيشن بگلبك وصوّر
گوم دوّر 
عن وطنٍ تايه بغابة
لملم رمادك
تطشّر
طير 
وكّر
ولو لفاك التعب إغفه 
بحضن غيمة ،،، 
وانتبه يابعد شيبي
عيونهم رادار يفتر
وشيل راسك
طخ نجم صبحك بگصتك
وانزل
إصعد
واِلبد بظلك تكتّر
إصحه لو غيّمت ربعك
امطر وخل يروَ زرعك
إطوي دربك 
لاتفرشه
وشيله لو دربك تعثّر
ولو شفت رمل الرِدي 
بيّس بگاعك
تمدّد بطولك النشمي
وصير نهرك
وشيّم إجدامك وأعبر
وبالك تعد النجم
لو ليلك المغتاض غنّتب
النجم شيب 
بشَعَر حزنك يخيّم
من تعدّه يگوم يكثر
وخلي خدّك نار كبرة
تبخّر دموعك الخشنة
وابچي
إبچي
الزلمة من يبچي يتطهر
ولا تخلّ الدمع يلمع
ظلّله بدخان صدرك
دمع مثلك، 
دمّه حنطي
دمع مثل وليدي أسمر
وخيّط عيونك وسدها
وروْف جفنك
إبشعر رمشك
لو شفت دمعك تماده
وگام يمطر

أخبار اليوم