گهــوه وكتـاب
منصة
2021/02/12
![...](/uploads/posts/alsabaah-67249.jpg)
+A
-A
سعد صاحب
هاي كهوه وذاك فوك الرف كتاب ...
اشرب الكهوه حبيبي واقره كلمات العتاب ...
لو خيالك جان ارحب من خيالي،
لو سؤالك جان اصعب من سؤالي،
تلكه ما بين الكتب ذاك الجواب !
تلكه مابين السمه وما بين كاع ...
تلكه علم الفلسفه وعلم اجتماع ...
تلكه ديوان الشعر موجود والحب والروايه،,
والكتب أنواع عدنه:
بيهن كتاب اليودي الروح للرب والهدايه ...
بيهن كتاب اليداوي اجروح ويزيد الغوايه ...
بيهن كتاب الطلاسم،
بيهن كتاب الملاحم،
بيهن كتاب النبايه !
واحنه وي هاي الكتب يا حبنه دايم ...
يا حلاته الجان كل سنينه بالتدوين هايم ...
يا حلاته الجان للطغيان رافض،
يا حلاته الصار جاحظ،
مات ما بين الكتب من جان نايم!
يا حلاته العاش عاشك للكتب من دون غايه!
وانه أتذكر صحبتي ويا الكتب صحبه طويله ...
هاكثر بيها مرارة وهاكثر جانت جميله ...
اول كتاب اشتريته بلا قصد هاي البدايه!
صدفه جانت مكتبه بصف البنايه !
من هذاك الحين مغرم بالعناوين الجديده ...
من هذاك الحين مغرم بالقصص بالذكريات وبالقصيده ...
واعتقد هذا العشك ماله نهايه!
والكتب مرات ندفنها حدر ذاك التراب ...
والكتب مرات ناخذها ونس نص المواضع،
جانت تنسينه دخان البنادق والحراب ...
جانت تودينه غبشه يم نهر فرحان مايه!
والكتاب هلال عيد بكل حبس ...
والكتاب بديرة الغربه يشع مثل الشمس ...
والكتاب اقرب حبيب اعلى النفس ...
والكتاب شما تسولف ما يخونك بالصعاب،
ما يبيعك يوم لو خان الدهر مثل الصحاب،
لنه خالي من الحقد ومن الغضب ومن الوشايه!
وانتي تفاحات عندج ما هي وجنه ...
مدري يا وجنه الابوسن ذيج هايه؟
وانه بلبل اشتهي تفاح جنه ...
اشتهي العرموط فوك من الربايه!
اه يل بعيونج الحلوه احس دعوه تعارف ...
اه يم رموش ملتفه وكحيله،
اه يم خد المرايه!
اه يم حاجب مثل جنح النسور،
اه يم شفاف ورديه اصيله ...
اه يم عيون ضاعت بيها روحي ...
ضاعت دروب الولايه!
اه يل كلج وكاحه ...
اشعجب وكت الصدك عفتي الصراحه!؟
واشعجب هاي الشفايف؟
من كثر ذاك الخجل تنسه السوالف!
وانه من كد الاثاره ...
انتظر منج اشاره ...
انتظر لساع منج انتظر اجمل احجايه!!