أرشيف جريدة الصباح

من قصائده: فصل الغربة

ثقافة شعبية 2021/03/29
...
+A -A

إلى عمران القيسي 
تجيني املثم اوعيناك جبهه
يوج الشوك بالسكته...  
وارد امشي عمر وياك 
سولف ع النثايه اتموت 
سولف ع الشماته اتموت 
سولف ع العراق ابكل مسافه اتفوت 
ودني..
الكل  عكد يذكر سواليفك:
طفل..
يبجي اعله باب البيت..
دليني الطرف... تيهيت 
ماضاعت عليه الناس..
لاجن مالكيت الناس 
لا ولد الطرف..
لا «خفكة العصفور»
لا جاي العصر 
مطرود...
رد بيه
وصيه لكل جرح ملجوم يمسافر 
اتيه ابديرة الحجاج 
ترد املثم اوعيناك جبهه... 
لا توازيني أو اجيك 
انه كلي اجروح..
تأخذني المصايب.. لو اوديلك جواب
انه حزن الماي..
واشموع النذر.. والريح 
واعيونك علامه 
أو بينه يتمره العراق..
لا توازيني ..
«السكوت ايتعب الموت» 
أو بعد بيه عتاب
أسماء 
وكفنالك..
بحر..
تنبيك كاعه الخيطتها اشراع،
بالريح الخذت وياك شاطيها،
مضيف الغربة الصفصاف.
اسامي الشال بعيونه الرمل خطوه أو نحر سيناء. 
اسمك.. ياعصا اتشك البحر واتخاف
وجد...
وانفض اجفوفك..
بسامير الصلب عيناك..
نزف منك وكت ..والكاع لو دارت عليك،
أو لو درب وداك طارش للكصب والهور...  
ياخذ كل سمجنه اوياه شمع منذور للفاله..
مدينتنه وجه زهار.. وبحزنه النهر طوف..    
ونته ولا حزن وازاك.
كمر واربعطعش ليله، 
أو عرس عشتار يبدي امن السحور 
أو ينتهي من توكع أو ننخاك 
ياصايم فطورك دم.
وجد واعلك الكافور..
واقره امن النواعي،..
أو خلهم ايردون راسك ع الرمح رايات 
من قصر الخليفه العمروه للموت.
لا تسكت..
كرامه الذلة اعيوني..
صرت مهوال..
أو حته ابشهكتك هوسه ادر بيهه وتر للصوت..  
لا تسكت..
هضيمه ايموت بشفاف القصيده الصوت.
 
1970
 

أخبار اليوم