أرشيف جريدة الصباح

خلگ ليلين

ثقافة شعبية 2021/05/30
...
+A -A

 فيان البغدادي
 
للبيبان ادگ نيشان...
هلبت بيهن اتمر طيف
واشوفنّك أثر رحلات...
بين اشتاي.. بين الصيف
واتلگاك ملگه الماي ...
لشفاف السواجي...
الذابله اعلى الراگ
يماشي بسد خلگ ليلين...
محنيه الجفون أعليك..
وأتبده بكحلها افراگ
ما تدري الغروب ايصير...
چادر...
ينّصب حسرات... للمشتاگ؟
رد...
اوخل ابخر ادروب هجرك... شوف
رد...
ان شاء الله...
اتمر فوگ.. جفن العين ...
سرب اطيوف
رد ...
وبروحي ادوفك... دوف
يلما راسلت...
وحشة روازيني... ضوه وغبشات
ردتك من اضيع...
اتصيرلي... ولايات
اريد اشتم... خلگ جيتك
واسولفلك... سوالف
كل عمرنا الفات
يالبروحي...
اهيسك موت
موتني...
اريد ارتاح من هجرك
اريد اغرگ... سفينه
بنص...
حضن بحرك
اريد...
اتطش لياليّك... بعيني
وتنعمي ابسهرك
حرت...
يا باب انيشنلّك...
صبغت ادروبك .. بدمعي
تعال...
او رد... يگلبي
الفارگت ضلعي
تعال...
الليل كلّه ادعي

أخبار اليوم