إنته اريدك
ثقافة شعبية
2021/06/27
![...](/uploads/posts/alsabaah-82895.jpg)
+A
-A
وفاء عبد الرزاق
إنته اريدك
بيـّه بات الـﮔيظ يزحر
وانتشي بظامي وريدك
بيك اهب عاصف بموجه
وبيك اخدر بالشفايف
بيك راحة ليل سكته
وبيك ثوري وبيك خايف
وبيك شمسه
لاذت بكتر الصرايف
وبيك عشّ لذة بسرابي
وبيك شامه تعلـﮔت بدلة المضايف
وبيك تعرفني المضايف
والخوافج حدر جدمينك وصايف
بيك نظره ألَم من ضيم الذوايب
بيك شايف
بيك ذايب
بيك لذّة ألم همسه
بغيمتي ترتـّل نشيدك
إنته اريدك
إنته اريدك
بيك اضم راحات فرغَت
وصوتك عـْذيبي بحنانه
يصب مزيدك
إنته اريدك
إنته اريدك
ردت افك حزني بحضرتك
واغفه مدلوله اعلى ﭼفـّك
شاطي للمجداف
لو طاش بعرفتك
يهدا بيدك
إنته اريدك
إنته اريدك
وآنه يلظامي عْلى نجمه
تفيض فزّه
تنوّر بغابر خرابي
دوهناني الثوب الأسوَد
بيدك الترفات تنفضلي ترابي
وياما ﭼلمة موَت تتباهى بشبابي
وياما ياما
وياما ياما
شما اﮔول الياما تخجل
من عتابي
ظلـّت السكته خضرمه
ولون يتحلـّى بخضابي
أرْد اصيحن آخ
واتجلـّى بحضرتك
وافتح بلوعات بابي
وياك آخر خيط شمسه
وكت الغروب وأهلـّن
مزنه طفله
اتدغدغ بشفـّة عذابي
وأرْد ارد سكته جديدة
ضايعه بوجهك واﮔلــّك
إنته اريدك
إنته اريدك
أرْد أجيلك وردة لـَﭼمه
بيها شوغة ماي
تغسلني بشليلك
أرد اجيلك ثوب راﮔد
والمسافر ينتـﭼي
بمهدود حَلـَك
أرْد أجي بكتمان عَشّش
موش انه
الكتمان رايد يشتكيلك
هاك انهبني بعرفتك
بيـّه لسّه الروح تتحمّل ثجيلك
خذلي باچي غروب شمسي
أرضى بس ويـّأك لو أمشي ذليلك
أرْد اجيلك
واختل بشهـﮔـه دليلك
خذ ثعابيني تحنـّت سكته بيضه
تضفر اللـﭼمه برحيلك
ارْد اجيلك
يل حـﭼـي حــْنـَيـْنـَه على شفتك
وهدهده كاروك جيدك
إنته اريدك
إنته اريدك
وآنه مسجونه اعْلى بابك
يل تفكّ سجني بحديدك
إنتَه اريدك
إنتَه اريدك
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة