ذو الفقار يوسف
أكدت القصيدة الشعبية العراقية من خلال نماذجها المتطورة فنيا والناهضة فكريا موقفها المشرف تجاه النظام الدكتاتوري، اذ شهد المنفى القسري نتاجات عدد منهم لتكون رافدا يصطف لجانب الآداب والفنون العراقية التي عاشت المنفى وهي مهمومة بما عاشه العراق وشعبه، لذا ومن باب الاعتزاز بتلك التجارب كرسنا صفحة هذا العدد لنماذج منها.
من: بانوراما عراقية
عزيز السماوي
{اهدي هذا التكوين اللغوي الى الفنان التشكيلي فيصل لعيبي}
دم .. ايلون الموجات ..تغبش بالفرات انذور
ينزف للابد جرح الخاطر المكسور
حار وجبير الجرح يلهب حلك تنور
غضب جوع اليذل الناس خبز لكل شهم ناطور
ما ينذل عراق الروح هيبه اعله التلال اصكور
صهيل الخيل بالظلمة وطن
كبل النصر منصور
اصابيعك ورد تنور
اصابيعك خذاها الماي بالظلمه شمع وانذور
اصابيعك نقش وردي ابصحن بلور
البصرة .. رفة جنح عصفور
البصرة ..ريحة خبز تنور
البصره ..ضيف ورطب واصبور
تضحك بساتين الفرح كمره او لمض تفاح
يخفك حمام الصبح هايم .. لعب .. وافراح
عيد أو اغاني او طرب تلمض سلة القداح
يغبش .. سفينة الجرح .. تايه .. بلا ملاح
منفي الجرح والنهر .. وين الوطن .. مالاح
البصره.. صلاح
يحلم ابذاك الصبح هيبة زلم وارماح
غضب جوع الفقير او ذلة الفلاح
كل غبشه يكول اليوم ارتاح
جفوفه .. كمر ازرك
يتلون .. فرح بين الرياح
جنون الوان تدوي الوان
السيف بالظلمه ومض فرحان
ورده الجمر من دون دخان
يطلع ابنومه كمر ناسي او حنين .. او شبك .. ينلاح
هايم ... جنونه سفن
تدوي العمر كله
ظلام أو لا نجم يلمض حنين
أو للابد .. ما لاح
عواصف تدوي باللوحه
صهيل اخبول وارماح
.........................
فاتحة المحبة
جمعة الحلفي
البارحه .. بالليل
كبل ما ينسه الكمر ضوياته ونجومه
كبل وجه الصبح بشوي
دك.. دك
دك بأبي العراق به..ه ..ي..د
افتحت باب الكلب .. اهلا
اهلا يا عراق!
اهلا .. وين دجله والنخل و بيوتنا الحلوه
بجه..
بجه بروحي العراق وسكتته اهمومه
وكعدني البجي من النوم
لني بغربتي البس المنفى هدوم
هوه هناك .. وانه هناه
شيجيب العراق واكعد ابجي وياه
............................................
يا عراق
رياض النعماني
حبيبي يا عراق ...
يا باب الخليقة.. وتراب الحياة
يا اول محبه بگلوب البنات
يأخذني عبيرك.. وبكل ورده ابات
وياخذني حنينك وبكل حسره ابات
احلف بالفرات .. وبمايه الزلال
وبنخله حزينه اتلم النبوات ..
عين الماتشوفك ما شافت حياة
يا شمس الشموس
ضوت على بابل
يسوار العروس ..
مشذر بالهلاهل
جان اسمك محبه
ومن كبرت عراق
ولو غمضت عيني
بالنوم انه اشتاق ...
تخلص الف دنيه
ويرحل الف ظالم
وتظل يا عراق
اول ورده طلعت
عالدنيا بترابك
واول غنوه تغنت ..
من شفة احبابك
يا اول حبيب .. ويا آخر حبيب
يجرحني واطيب
ساعات المحبه ..
وساعات الحنين
ومن يصفالي دهري .. اتمنه العراق
ماغمضت عيني
ولو غمضت عيني
بالنوم انا اشتاق
تخلص الف دنيه
ويرحل الف ظالم
وتظل يا عراق
