عريان السيد خلف
يناهي الشوگ ذمـه وذات من ذات
وفرق ما بين حالي وحالك ابعيــــد
سنه وصدك يِضَـوگ الروح لوعات
ويچملي الجروح جروح ويزيــــــد
أبات إبحضن صبري إليال ويباتْ
جرح يصحه وجرح متغصب إيهيد
وأگول إشوالف السرحان للشــاة
إعله سـچه وگاوداه الإيد بالإيـــد
إلك چـانت يحلو الطول جيـات
عجب تبخل علينه إبجيـة العيـــــد
.............................
تنينه وأملينه إچفونـه إبطيفْ
وصبرنه وصبرينه الآه بـــــالآه
وتحسفنه الحســافه وحيف عالحيـف
عله إسواجي الدموع المالهن جـــــاه
وعرفنه وعود حبك غيم بالصيف
المحل وين المطر بالصيف يلگاه
إشيصير إعله الترف لو ينحسب ضيف
إعله غفله وعيد وصل الزين محــــلاه
أنه إبعازة الموت وحاجبك ســيف
وأمــوت إبغير صدة غيض ما ريـــد
إلك چانت يحلو الطول جيـات
عجب تبخل علينه إبجيـة العيـــد
أحن لمسامرك ولگاك شلگاك
شَرِي المعشر حلاوة شــوگ مابيــــك
يمر صيفك صبر وتنَطر إشتــاك
تبيعك عزتـــك وبذلـتي أشريـــك
تراك ويه النفس يلما تجي اشراك
وبالدم اليدور تدور أحس بيك
يبو الروح إعله روح إهواك شلهــاك
وإهي إبعيـن الشفاگه إليال تِربيــك
أبد ماسامرتها الآه لولاكْ
ولا چان إعله دربك لاويــه الجيـــد
إلك چانت يحلو الطول جيـات
عجب تبخل علينه إبجيـة العيـــد
.............................
أنه ولا گول عنـك غير معذور
ولَو ما ظَلْ عذر للروح ينگـــال
لـَچنْ ون اليساهر ليل معـذور
ألم لو من وكت لو من ولف شــــال
وانه إبحالي إعله صبرك حال مزهــور
صبر ومكابر المحتـــام جَتــال
إلك عمري إعله زين وشين منذور
ولَو من السنيــن إوشال ما ظـــال
لـَـچنْ يبقه الجفن للطيف مسمور
ويظل راچد عليها النوم ترچيــــد
إلك چانت يحلو الطول جيات
عجب تبخل علينه إبجيـة العيـــد
