ذكريـــــــــات
ثقافة شعبية
2021/07/25
![...](/uploads/posts/alsabaah-85563.jpg)
+A
-A
لطيـف العامــري
اصبع اصبع
اصبع اصبع
چان چفك جاي
وآنه بروحي شوغه
وباب سجني يخاف من خيط الضوه يوصله الي
شلون وصّل چفك الجايبلي صوغه؟!
وآنه أشوف بچفك أحلامي القديمه..
ذيچ أحلام الطفوله..
وحسرة الثوب الجديد
ودمعة العيديه باول يوم عيد
العيد عدنه..
مو مثل وجهك حلو
عدنه مرجاحة العيد خدود ثكلى
واللي يتمرجح دمع..
وشفت چفك..
هاكثر چفك جميل
چنه كل اصبع نبع..
والعطش بينه
شلون اسولفلك على سنين العطش؟
الهور زنجـــــــــــر..
والنهر نشفت لهاته..
والملح مابيه دغش
وانت يل چفك قضيه..
شلون اورقلك همومي..؟
ورقه ورقه
وليل ليل..
وحيره .. يل چفك شباب
تعافه من ما شاف حيل
يصافح حرورة شبابه..
شلون لو چفك يمر مطلع قصيده..
شلون أكملهه شعر..!
وأقراهه لليردون شعري..
شلون أوصل للأريده!؟
وأنت چفك مره لو يخطف علينه
يعيّد الماشاف عيده..
ولا تگلي البيت عيده..
آنه جاي أنزف همومي.. وحبري دمي
آنه مو بطران جاي أكتب قصيدة..
چفك مرايه شفت بيهه حياتي..وذكرياتي
وآنه هم شلون أحمل ذكريات!
كلهه خاكي .. تگول ساحة عرضات
تبتدي بفرضة وشعيره
وتنتهي بأرض الحرام
شويه خل أخدر على شباچ چفك
آنه أحس چفك إمام
شويه خل استغفر ذنوبي بحضرتك
ملت الغربان روحي
خل يحط مره الحمام..
وكافي أسمع (ياحسافه)
شويه من (حن وآنه أحن)
ضوگني شهگه..
روحي ملت راشديات الحكومه..
شويه مد چفك عليه
أشبگني
وعيونك اذوب
بدفو الشبگه..
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة