يوسف المحمداوي

....................

جيت أمدحك... يلي ما محتاج أمدحك

يا لغة التدرك أسرارك...؟

ويا فكر يستوعب التاريخ كله ويصف جرحك؟

شلون أمدحك...؟

وهاي گبتك كون يضوي...عالي...جاس العرش صرحك

ألف مرة النعتنيلك والألم بينه طوايف...

وبس نطب للصحن شولمانه فرحك..

يا لتصوغ الفرح لحبابك محنه...بزهو من سيف النحر زفاها رمحك

خله ليل الجور يطاول علينه...مايهمنه

لأن تارس عين اليحبون صبحك...

منعوا عيوني تصبلك ...

وكمت أنشف الدمع ...بس گلبي يتمضحك... 

غشمه ... مايدرون نبضاته حسينية شيمسحك ؟

ما دروك إعجاز...بالمصحف سوّر وآيات تتبارك بشرحك

وانته جدك بسمه يتباهى العرش ويصيح طه...

وانته امك فاطمة والحور عد رجليها بالجنة اتباهى... امنين امدحك؟

وانته ابن من؟ انته ابن حيدر علي ...وياعلي ما محتاج أوضحك...

وانته اخو من؟...ذاك ما وصلت غيوم السمه الجوده...

الغيم يبچي من يجود وهوه يضحك... 

وانته ابو من؟...

انته ابو السجاد چم ايوب يم بيبان صبره خشع للحك...

انته يالگيعان علمك من مجدها ...أعلام دين....تخاف يامولاي والله تگول فلحك...

ياكتاب بلا نهاية ...اشما قريتك ...ألگه روحي بالبداية .. وتوني أصفحك... 

انته بعيوني حقيقة ...وشحتني بالضمير الحي...وانه بعبراتي أوشحك

حاولوا يلغون دمعي ...طاوعتهم مرة مدري شلون صارت!

وگابحت دمعات عيني....وعشگك الينبض بدمي...صاح أفضحك... 

ألف فرعون انتهى وحسين باقي...

ياكعبتي الثانية...يا {ابرها { اليگدر يطيّحك؟

يلي ما نحني هداية...ودين تقوى ونهج نصحك...

شعدي غير الشعر يامولاي أمنحك...

ياشفيعي عالصراط ومن أبيع الدنيا ماندمان ...

لو ليله بحلم يحسين أربحك...

شعلم الهرسك تعنولك مواكب؟

يالصرت لديان كل الارض صاحب..

امخيّم اعلى الكون گله ...شنهي جنحك؟ 

وموحمام السكن گبتكّ!!

هاي حور العين سالبها عطر جنتك ...وحطت فوك سطحك

فنهم يمنعون جدمي من اعتنيلك ...

وأنه بالكاروك ذوبني ثديها بطعم ملحك...

گمطتني بحبل ودك...ومن تلوليلي بدلول العشگ ...

يحسين مثل النور ويّه الصوت ألمحك...

چم علك من حضرتك شدت بزندي؟

وكبر عودي..ومن طفح نيشان ودي...تريدني الغمان أمسحك؟ 

احسين مو چلمة دفاتر.. وحسب الطاغوت تنحك!

يلي مرعبهم بدمعي...ما اجيتك أشكي وضعي

وما أگلك عاللصوص الرافعين چفوف تدعي! 

وما اگلك من كسر ضلعي ...واجه مشاي ينعي !

 ما أگلك ...لأن تدري..

بس اجيت اليوم أمدحك ...وانته مامحتاج امدحك..ولأن أدري... حضرتك يحسين للزوار

بانيها العرش جنة أرض من يوم ذبحك...

ومو حمام السكن گبتك  

هاي حور العين سالبها عطر جنتك وحطت فوك سطحك

شلون أمدحك؟