عبد الخالق المحنة
چنها زينب هاي بـت حامي الدخيل
بس عجيبه انشوفها بلايا أهل
كون اخت عباس تركب على هزيل
يعني يا ستار عباس انچتل
هي زينب هاي عل الناگة وتميل
ومن تميل الريح يسندها بخجل
بيها هيبة حيدرا وزعل الچفيل
وبيها صبر حسين لاح وياالزعل
والعجيبة شلون يحديها الغريب
وانا أعرف زين باطباع الچفَل
وچنه راس حسين ذاك على الرمح
وهذا يا سيف اللي ذبح خير العمل
وين سبع القنطرة وسبع الطفوف
شصبر الراس على رمحه وما نزل
بعينه من شاف الشمر سوطه يلوح
بمتن زينب شلون عباس احتمل
يعني هاي ام الخدر زينب أگول
يعني أيس لاخدرها ولا أهل
يعني لاچفالها يلوح الجفون
ولا أبو الحملات من صاحت حمل
يعني ظلت بين چتال الحسين
وبين سلاب الربى وحضن الفشل
بس على اعناد الوقت وشما يجول
ما تهبط راسها ربات الفحل
هي زينب ما يغيرها المصاب
چان على الناگة واذا فوق الجبل
