السلام على الغصن .. مكسوراً غير منكسر
ثقافة شعبية
2021/09/25
![...](/uploads/posts/alsabaah-93712.jpg)
+A
-A
عامر عاصي
ضريحك بالعطش .. ينبوع للثورة
وضفيرة نور تمتد .. ساجية بصحره
ضريحك بيه شمس مجروحة تنزف نور
وشبّاچك وطن والروح بيه تدور
ربينه بحضرتك هاي
جهال نزور حفّاي
وتعلّمنه بهواك نطرّز العَبرة
ضريحك بالعطش .. ينبوع للثورة
يا أوّل شهيد نولد يوم الطفْ
ضحّيت برضيع وفوگ صدرك رفْ
جِفَلْ مثل الحمامة
شذرة من الإمامة
وعلى تراب المخيم طاحت الشذرة
ضريحك بالعطش .. ينبوع للثورة
ضريحك للگمر عالمشرعة تبسّم
وتِبَسّمْلك گمر مجروح ومثلّم
وزرعته على الشريعة
دمع بجفون شيعة
وحلم فوگ الجرف كل عام ننتظره
ضريحك بالعطش .. ينبوع للثورة
ضريحك بيه صهيل .. وحزن ما ينشال
حزن ميمونك .. اليشتاگ للخيّال
بدمك .. فوگ المتون
النثايه انزِرْعَتْ عيون
وسنابل شوف .. حد ما تنطفي الگمره
ضريحك بالعطش .. ينبوع للثورة
ضريحك بيه رمح مجروح .. ومرايه
انكسر بيها النهر .. وتعثّرت راية
ضريحك بيه نِدَهْ وناي
وحنين ومستحه الماي
ونهر يندار فشلة .. وينكسر عثرة
ضريحك بالعطش .. ينبوع للثورة
ضريحك بيه محبة تطرز چفوفي
والطمهن بضلعي، بلهفتي، وخوفي
ضريحك كعبة دموع
مواسم تمطر شموع
وتراتيلك مدامع طفلة منكسرة
ضريحك بالعطش ينبوع للثورة
شفت وجهك إمام.. وشلت وجهي ذنوب
وصِدَح صوتك سلام.. وصِدَح صوتي حروب
وعِفِت صوتك تراتيل
ألف قرآن وانجيل
يتَعَثَّر بالسيوف ويغفِر العثرة
ضريحك بالعطش .. ينبوع للثورة
ضريحك بيه طفِل غازِلَت نحره عروش
وغُفه طير السهم.. من بِنه بنحره عشوش
ضريحك علَّم الروح
تفز عالمشرعة جروح
ومدامع أم تگضّي الليل منتظره
ضريحك بالعطش .. ينبوع للثورة
على الشباچ شفتك .. ياشمس خَيّال
يخيّال الشمس جِثِّتَك ما تنشال
الذهب من صوتك يلين
ويخطّك بالضوه حسين
ومو كلمن يزورك بالذهب يقره
ضريحك بالعطش .. ينبوع للثورة
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة