أرشيف جريدة الصباح

شلون تجري

ثقافة شعبية 2021/09/25
...
+A -A

  رحيم المالكي
 
الى الان تجري يا فرات؟
شلون تجري ومايك ازرگ يا فرات؟
وانته ذنبك مو ذنب يگطر دمه
تسابگت بالطف على حسين السيوف
ومايك اول سهم في صدره انرمه
چان مايك احد من كل السيوف
حيل أثر بالحسين وألمه
بس بنات المصطفى حر الچبود
حسين حر وهاي للحر تلچمه
وعطش عبدالله اللي فرفح بين اديك
گطع گماطة ولعد مايك ومه
طاح ابو السجاد يم جرفك شهيد
بين سيفين العدى وسيف الظمه
انا لو منك اودي ويه الطيور
الماي خاطر منسئل ليش ولمه
لاچن انته تريد تذنب يافرات
وهاي ماتحتاج شرح وترجمه
انفرط عقد الدين وعيونك تشوف
وچان ممكن شربه منك تلظمه
عطشيت الدين عن بكرة ابيه
وگطعيت چفوف سبع الموزمه
تدري لو مايك وصل يم الخيام
چا روه العباس منهم صارمه
وچان ما ردت رؤوس على الرماح
چان ردت خيلهم تگطر دمه
شلون طاح حسين يم جرفك شهيد؟
وما ركض مايك لعد جدمة انرمه
طاعت اسماعيل صحراء الحجاز
وانته شح مايك لابن حامي الحمة
ما ظن اسماعيل افضل من حسين
وما اظن امه اتقدم فاطمة
ذاك ابن واحد سأل رب الجليل
كيف تحيي الموته وترد قائمه
وهذا ابن حيدر علي سيف الرسول
المايخاف بدينه لومة لائمه
الگال لو ينكشف عن عيني الغطاء
ما يزيد من اليقين الفاهمة
يافرات وبعد تجري يافرات؟
المايشوف الحگ عسه بعينه العمه
گوم طم روحك حدر گبر الحسين
واغتفر لله واطلب مرحمه
گوم واغسل مايك برمل الحسين
وخلي مايك يا نهر يتيممه
الفرق شوفه بينك وبين الكرام
حسين شاف الدين عطشان لدمه
ضحه باخر قطرة من دمه الشريف
وظلت آخر قطرة ثورة وقائمه
حسين اصل الجود وانته اصلك نهر
ويا نهر للنبع انطه وكرمه
حسين صافي واصفى من ماي الجنان
وانته اصلك طين وجروفك طمه
حسين لو منك شرب چان ارتويت
وچا تشرف مايك ولامس فمه
لكن انته الحظ عماك وتيهيت
وسوء حظك رادلك هالخاتمة

أخبار اليوم