ورد النرجس
ثقافة شعبية
2021/10/03
![...](/uploads/posts/alsabaah-94425.jpg)
+A
-A
رحيم الغالبي
مثل ما يثلم ..الخبزه، ثلم گلبي
صلاة الصبح، حسبالك
وأگابل بيها بس ربي!
مسح بعيونه، من يخزر
نبض گلبي
عذاب العمر.. گضيته
وعتاب الگاه، بنص كتبي
رسم عالحايط من ابعيد
هواجس روحي
نور وضي
مشه الحايط... وظل الفي!
عبرت اشگد
سواجي وياك..
عافتني الجروف..
وثبت بس المي!
مشت ليش الشوارع؟
ظلت الخطوات.. تتخبط بغربه وهم
گمت اتطشر والتم!
فتحت الگلب.. طلعت الاسرار البيه
شفناها، چذب مديوره دايرنه
واحد چنه..
صرنه اثنين
واحد عكس الثاني... سافرنه!
ابد نتلاگه مره
ويصفه ماي اوياك خاطرنه..
أبد.. عكس الحلم گالوا الصحوه اتصير
والموعد.. طفل حباب
كل يومه يناطرنه
عكسنه العمر، شفنه اوياه آخرنه
هاي اسنين
مفتاح العشگ ضايع لكل البوب
لا تگضي ولك ياطيف
خل اتهنه بيه فد نوب!
ما حسبالي.. ورد الليل
ألگه الصبح.. بس خرنوب
چم مره؟
چم مره... كسرنه العمر
من نصه؟ ابمعزه نتوب!
چم مره
نحط العين
بچفوف الزغار... انريد بس مكتوب!
هاي اسنين
تاكل عمري
دوب ادوب
ورد النرجس بروحي.. مثل صبير
يرسم عالضمير اذنوب
ذبنه، ومثل ثلج ايذوب
تبنه... ونعتذر من الزمن
والفي ومن أيوب
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة