لميعة عباس عمارة

 

اشتاگلك يا نهر يالبردك الجنه

صفصاف شعري هدل وبمايك اتحنه

لزني على صدرك هله .. وسكته .. وهله .. وونه

وطول مادام الحلم ما ينشبع منه

عمرك ابد يا ابد متباهي بسيله

وعمري اشكثر كم شهر .. كم يوم .. كم ليله

موجه على صدرك نبض .. نسمه واتچيله

بلياك يا ضيعتي والعمر ياويله

التغريب كلله تعب دير البله محدار

وخلي الليالي تمر نكته وسهر واشعار

تشرب عيوني الگمر

بس الخدود اتغار

من يسگفون السمچ واتلالي بيك النار

گلك حلو خابط وصافي وسخي مهيوب

تتباها .. حگه يتباها الها كثر محبوب

من منبعك للمصب فيت عليك كلوب

ياما رويت الغزل .. ياما غسلت ذنوب

رديتلك يا نهر يالبردك الجنه

صفصاف شعري هدل وبمايك اتحنه