سعد صاحب
ا
سمعت كل الجنوب ينوح فوك من الجنازه...
اسمعت تلطم عليك بكل غضب أم المناضل,
اسمعت ذاك الملاك يصيح بالصوت الفجيع:
مات للثوار قائد,
مات للاشعار رائد,
والحزن خيم دهر فوك القصايد..
يا طعم دونك يظل كل زاد فاهي,
يا ذهب بعدك شبه كل الكلايد...
يا بنفسج من يشح عطرك نضيع!
يا ثلج فوك الجبل للحين جامد...
لنته بالجف يوم مايع,
لنته تجدح نار ما بين المواكد...
وانته بالثورات وزمور التفك ماهر ضليع!
موكب التشيع حاشد...
بالحمام وبالورد والياس والريحان والقداح شاهد...
ما شفت يمشون ناس ولا شفت بالكاع واحد,
بس شفت كل البساتين المزهره,
بس شفت كل الرياحين وعطر مليون زهره..
بس شفت كصت جنحها من العرك اجمل حمامه,
بس شفت بلبل يحبك طاح بالشارع صريع!
واحنه من ظلمه اعلى ظلمه..
بين صحوه وبين غفوه,
بين موقف جان صح وبين هفوه,
بين جيب وبين ودي وبين هاك..
بين روح الدار غربه وبين لصحابي ارد,
بين اجيك بلا هديه من السفر وبلا ورد,
بين امشي وبين اعوف المكبره وما بين اتاني..
بين الم دموع صره,
بين اموت من البجي بحضرة شفيع!
نفسك الطيبه غدت بالكون نسمه..
واليشيعونك حمد وسعود جانوا ذول همه...
جان تابوتك على اجتاف الفلاليح النشامى,
بيد حجام وحرز وصويحب الثوبه بعد لسه نجيع!
وانه من حزني اخبرك:
جاي مو فوك السجج ريل الفواجع..
جاي من تالي الطوارف,
جاي من تالي الرعد..
جاي من اشور من كيعان سومر,
جاي من نص السمه العالي بجنح ثور السريع!
جايب وياه الشمس ونجوم وثياب ومكاحل,
جايب السعفات حد الموت خضره..
جايب الجنه الجبيره الواسعه بجنح الملاك..
يا جماله الدوخ الخلان سحره,
لحظة الحب غافلانه وسكته من عدنه خذاك,
واحنه شفناك اعلى شجرة لوز كاعد,
صحنه ذاك مظفر النواب ذاك,
لكن من الخوف واللهفه القطار..
طار بيك بساع طار..
طار صوب الرازقي الفواح بالبستان عطره,
طار بيك الكون ثاني,
طار بيك وراح للغيب الحلو الزاهي البديع!!
