نورهان شيراز
هذا وجهك لو گمر لو جامه
الضوه مايتچتف بكمامه
ذبها خلي انشوف نعمة الله هاي
صحره والدنيا عطش ونريد ماي
تره الكمامه صنم للعنده راي
حاچي عقلك خل يرد لأسلامه
الضوه مايتچتف بكمامه
اني لو بيدي احط وجهك درس
بالعلوم وابدي اشرح عالشمس
والمدير يگلي جايبها ترس
لا وسيلة ولا تعب رسامه
الضوه مايتچتف بكمامه
درس بي نحچي على اسباب الغيوم
اقصد الكمامه يل عينك نجوم
راح اگلهم تره الغيمه ماتدوم
ومن تزخها تفرح الغنامه
الضوه مايتچتف بكمامه
ليش رايد تخفي كل هذا الدلال
ربك اصلاً خالق الورده خيال
اي جميل وگال اموت عالجمال
وانت عطرك يشبه الشمامه
الضوه مايتچتف بكمامه
