حيدر حمادي 

من تشتاكلي اندهني  

افز من طينك ابنادم 

ومن تضوج نصي الصوت لا تنباع

بمرامك يا ضوه

ويا حفله بالمحراب

حيل تأخرت يعروك كل كمرة

من ماجيت

نامت كنطرة لمن شلتها الباب

نزّل عينك امن الغيم مامش ماي

افكارك كلها محتركه واشم بشعرك العطاب

فرج كتلي ؟ وكلتلك لا

مفاتيحك خناجر للصبر يفلان

سواليفك اكماط اجبير

يتسمى جفن يفلان

ولك يفلان

تلث اميال بالساعه ولكن قيدهن واحد

و أنه وانت شرايط سود

كشختنا اعله مجرى الحزن من نكوم

المثلنا يموت من يسمع حجي الالوان

اخذ جنح الندى المكسور

الشمس تكسر جناح المي

تعلمتك ورق كتّاب يوكف فوك راسك ضي

الشمع مصيوغ يم راسك منارة ضي 

تعلمتك 

صواني التين 

تفز من جيدك احميمه 

تطير لشهوة اسماي 

وترد نعسانة يم صدرك اتدور في 

و اظن تدري

رمش الينكسر بالليل

ريحة طيف منه تفوح بالغبشه

أنه مثلك ضعت شطين وانه تراب

المثلي ما له عش لو مات

هذا انه وحش متعوب

بلكت ينعرف عشه

كلتلك فرصة يالمتعوب

سواجيك النشفن ليش

ماترضاش انزل بيهن اتمشه

أنه اتمنيت

افك شباج كذلة غيرك وابجي

ويحط ايده على اشفافي

ويأشر كافي لا تحجي

المن هالعشك مادام 

حظنا يعاند الله ويشتعل كفرة

المن هالبجي اعله الموته من الناس

مادام اليموت يموت

بس يرتاح من نص وادمه بكبره !

المن( داخل ) ايغني امن التلاثين

وام كلثوم باست صوته والغترة

عطايا الدنيا 

كلش ما يماشن ذوقنا انه اوياك !

حزن ترابك يغني على الشباج كل حيله

وهلاهل ماي تترجاك

سافر طين

بلكت طين يتلكاك !

ولك بلكت حبيبك يفك ثوبه اشراع

حبيبك شاعر امن ازمان

صاريه القلم من يبحر ونهدك خشب بالماي

اهلالك حيل يشبها السفينة التعتلك بالماي

تريد اضواك ؟

من حقك تريد اضواك

الله ايكلك انت انسان

شنـــو ذنبـــك يمــوت 

اضواك !

ويجيك الصوت :

ها يفلان

تسافر وين ؟ جا والليل ؟

السجة الفوك شباجك ستاير رادت وماشافت امحطه

ولا سمعت بطاري الريل

ابنادم طبعه من يشتاك

لبلعـــة ريجـــه مـــابي 

حيل