حميد قاسم

(1)

شگد بچينا بلايه صوت

هوايه غيّرنا بغرفتك من رحت 

ابواب كنتورك قفلناها بهدوء..

وما بچينا..

(لا ، چذب.. 

شگد بچينا بلايه صوت..)

وصورتك من انت تضحك..

انشالت من الحايط اليسأل عليك

انحطت بنص الكتب

زحمة ع الحايط تموت

بدلينا الباب، والعتبة الصغيرة

خاف تگعد

تحب تمشي..

خاف تتعثر اجدامك من تفوت

وبدلينا الچرچف البعده جديد

خاف يشتم ريحتك..

الهايمة فوگ البيوت..

حتى ريحة جسمك الترست البيت

لملميناها بهدوء، 

مثل چفية مهر

وبجنطتك دفنّاها..

نخاف نشتمها، 

على غفلة ونموت

 عامر عاصي

(2)

وهم ماجيت

قذيفة     

الطشّت أحلامك، 

طفت بالگاع

والتمّيت .. 

حفنة مي ورد، 

گطَّر على خدودي، 

وصِحِت حَنّيت ..

يمته اشتم ضواك، 

وتنثلم بالروح، 

خبزة بيت .. 

يمته؟ 

تجيبك ال(يمته؟) 

شَتِلْ نعناع؟

يمته الگاع، 

تتوسَّدْ حنيني الضاع؟ 

ياااا .. شنهي؟ 

ولا ظنيت .. 

أشم حلمك نبع، 

واعطش،

وارد اعطش، 

شما ونّيت ..

يَوَعْدي الما يرد، 

وفّيت .. 

ونشف بيّه الندا ، 

شگد ندا ،

وهم ما جيت ..

……..

وهم ما جيت ..

مر ليل، 

وغفت نجمة على خدودي.. 

ومر طيفك، 

وزلفه اتوسّد زنودي .. 

وگِلِتْ حَنّيتْ .. 

وهم ما جيت .. 

إجو كل النِسَوني، 

ومِشَو من ونّيت .. 

وهم ما جيت .. 

مِشَو عنّي، 

ولِگوني وياك من حَنّيت، 

وهم ما جيت .. 

چا يَمْته تِجي؟ 

احلامي اعله طولك بيت .. 

فَصّلْني جَرِحْ، 

ينلِچِم بالياريت .. 

واشبگني حلم، 

مَرْ نوم، واتعنّيت .. 

وهم، 

ما جاستك روحي، 

وگِلِتْ يستحي، 

وهم ما جيت