من خوالده:

ثقافة شعبية 2023/05/18
...

1

يا حزن ياريت اعرفك

چنت اسويلك حديقة ياسمين

وممشه من كاشي الفرح جدام بيتك

يا حزن وك يا حزن ياريت اعرفك

چان گتلك لا تجيني

وتمشي كل هاي المسافه

أني وحدي چان اجيتك

يا حزن وحياة حزنك ماعرفتك

چنك مغير مشيتك

حاط ريحة رخيصة كلش

يا رخيص اشگد بچيتك ...


2

تحنّن 

دوس

فوگ الروح 

وأحسبها عَلَي مِنه

أطگّنْ ورد

من تجزي

وألف نّمام .. يتحنّه

بترف جدميك أطيرن فوگ

فوگ الفوگ

اكتّنْ عل الورد

مِزنه

من أشوفك

أنذر النجمات ترجيه لسوالفنه

ووديلك هوى شگابين

وتردني بطرگ ونّه !!!


3

يجي يوم .. نرد لهلنه

يجي يوم إنلم حزن الأيام

و ثياب الصبر

و نرد لهلنه

يجي يوم 

الدرب يمشي بكيفه

و ياخذنه لوطنَّه

يجي يوم

انفرِّگ الغربة على العالم ملبَّس

و الحزن طاسات حنّه ...