مواسم

ثقافة شعبية 2023/05/25
...

 لطيف العامري 

من الأزل يمتد الظلام

… وكان وجهك شمسا

تدنو من القلب

ويهبط الضباب .

وتعجبت ..

صافحتني وچفك بچفي برد

نصين مشطوره الشمس

واحنه كل واحد وظله

والمسافه بّين ظل چفك وچفي

بطول دمعة باچر

وضحكة أمس ..

شتثگل بروحي انحنيلك

مو مذله

العثگ طبعه يماشي سعفات الگلب

وشيثگل البرحي على چتفه

يدنگ يشيل الرطب لاينحبس

ألقصيده التنجرح تنزف عتاب

تشگگ هدوم الخجل

تصعد ثريه

ومن تشوفك تخجل وتنزل همس

والفرح كحلة عروس

انغسلت بدمع الرصاص

الشگگ هدوم العرس ..

غيّم الدخان بيّه

ومطرن بروحي الظنون

الگاع مو بس للورد تفرش جنحها

وتسجد الگطرة نده

تمد جنحها الثاني للعاگول

يكفر بالمطر لو شح عليه

ويشيل روحه الوحده ..

صافحتني

أنت يل چفك نزيف سنين عمرك

وآنه من دمك رسمت أول خريطه

وتو أريد اكتب عليها

حروف .. اسمي .. بيتي .. عنواني .. قضيتي

چفك بچفي برد

وتعجبت .. !!

گبل عيني يغرگ بشاطيها دمعي

بيك غرگت بالدمع

عمري چلمه اندفن بتراب الرفوف

اقراني كلي

يل شعلتك بيّه نار

أنت تكبر بالظلام

وآنه ازغرلك شمع

والعطش ديرم شفاف سنين عمري وماشكيته

ومن لگيته أتدنه يمك

حشميت سنين عمري

يطگن ألعمرك نبع

يل خذت كل الگمر لون ومشيت

وآنه أخذت الليل لوني

الگمر لو ما لمّه ليل

بيانهار يظل يشع

أنت مني

شجره روحي وحبك يمرني مواسم

صافحتني بچف خريفك

نزعتني اوراقي كلها

وصافحتني بچف ربيعك

مات بيدي

وچفك بچفي برد

وتعجبت ..!!

ألدمعه من تنزل ضحك

تنزل رخيصه

ومن تشب بركان بظنون 

الندم

تنزل ضريح

لاتمد جنحك شمع

وتگول اصلبوني قضيه

ولاتحط روحك مسيح

أنت أول لافته اتشگگت من ثگل الشعار

زغرتني والحزن بيّه مشى

بكبر الضمير

بّردت أول شراره بروحي

يل مايك غطاني منين أطير ؟؟

آنه دليتك عليّه

وعلگت ورقة مصيري

بيّن چفينك رساله

ردتك تصافحني وتوصلني

لگمه الكل فقير

ردتك تصافحني وتوصلني

چلمه الكل أميرِ

صافحتني وچفك تشگگ  مصيري

وچفك الثاني برد

وتعجبت .. !!!!!