فرح مكسور
عباس رضا الموسوي
* إلى الشاب الراحل حسن حمزة الحلفي
حسن زفوه امحنه بدمه يحديثات
گومن بالهلاهل هذا ابو العفيات
******
حسن وجهه الربيع وطيب الشوفه
اعله كيفك يالتغسل طاحن ازلوفه
حسن جرحه غميچ ومحد ايروفه
راح البلكلافه ايصير ابو الكلفات
******
حسن غيرة شباب الحي ترس عينه
حسن ثاية بخت لو ظيم مر بينه
حسن فرهود غبشه انصاح بسنينه
عثرة دهر موته اتعادل العثرات
******
بشبان ابرخى .. لمن تشيلونه
اخاف يطيح حلمه السكن بعيونه
بشيشة عطره واسي فرشة سنونه
ويغرفة نومه گومي وكسري المرايات
*****
ادفنه بگلب امه اهنا
يهل الدفان
وانثر هيل فوگ الجسد مو تربان
حسن طبعه غوي روح انشد الشبان
حسن عصفور طار وحزنن الشجرات
*****
حسن سنبل العنبر بالخضار ايزيد
يمنجل رد بعد وكت الحصاد ابعيد
يناعيه الفجر ، رمضان .. وباچر عيد
حسن عيدية اهله الدمعة والعبرات
****
حسن آخر قصيده بفكر شاعرها
حسن صورة فرح مكسور خاطرها
حسن چلمة بخت مات الي گايلها
هلهوله انطفت بمزاحم الصرخات
*****
حسن ابن المهيره الخير بشكاله
حسن ديوان ابوه وريحة ادلاله
حسن بستان عاث الريح بسلاله
حسن فارس عثر وانتكست الرايات
