رحيم الغالبي
مثل مايثلم الخبزه
ثلم كلبي
مسح بعيونه من يخزر
نبض كلبي
وصلاة الصبح حسبالك
واكابل بيهه بس ربي
عتاب الصبر كضيته
وعذاب الكاه بنص كلبي
رسم ع الحايط امن ابعيد
هواجس روحي، نور .. وضي
مشه الحايط .. وظل الفي
عبرت اشكد شواطي اوياك
عافتني الجروف
وثبت بس المي
مشت كل الشوارع
ظلت الخطوات
تتخبط بغربه ودم
فتحت الكلب
طلعت الأسرار البي
شفناها جذب.. مد روحه دايرنه
واحد جنه.. صرنه اثنين
واحد عكس الثاني سافرنه
ابد نتلاكه ماي
ويصفه مره اوياك خاطرنه
ابد... عكس الحلم كالوا
الصحوه تصير،
والموعد طفل حباب
كل يومه يناطرنه
عكسنه العمر..
شلنه اويا.. اتغربنه
هاي اسنين.. مفتاح
العشك
ضايع لكل البوب
لاتكضي ولك ياطيف
خل نتهنه بي فد نوب
ما حسبالي ورد الليل
الكي الصبح بس خرنوب
جم مره كسرنه العمر
من نفسه
بمعزه انتوب
جم مر ه نحط العين
بجفوف المتاني
انريد بس مكتوب
