شدهني
ثقافة شعبية
2019/08/23
![...](/uploads/posts/alsabaah-17799.jpg)
+A
-A
حمود حسين كعيد
شدهني الما عبر عشرين
وألف ناظر على البيبان حياله
شدهني واخذ كلبي
بنظرته وصار دلالـــــه
امفصل والفصال افصـــال
مشدوهة البنات ابجرة افصاله
امفصل والبياض ايصيح
يا لون اليلبسه اللون يحلاله
ما ضمه ســـواد الثوب
بياضه من سواد الثوب يتلاله
يتــــلاله بظلام الليــــل
كهرب وبضواه امكنسل اللاله
كهربني بنظرته ومال
وركصني ركص مذبوح وكباله
كهربني وصرت مجنون
امــشط بالشعر وانزل على هلاله
الفن والثواني اشهود
ومن جدمه لعد الهام اتعالــه
اتعاله وخلي العين
شــذره بدورة الزنجيل مياله
امــــــــــــيلن والنظر يندار
يشرب من ضواه ويظل يبراله
اميلن وبريتي اللهب نارين
وانفاسك برد وتعادل الحاله
دحط كلبك وسط كلبي
بدمي دخله يدور شلاله
يما تدري تناهه الحيل
وجس عودي الكبر وترادت احواله
يما تدري فرهدني الخريف
ولم روحه الربيع وكتر اسلاله
ذبل ورد العمر
وبقيت انته العمر ومورد اماله
يهل وردك ولا مفطوم
يظل بيك الامل سهران مواله
ضيفني مثل ماريد
وخل عنك حجي الينكال والكاله
ضيفني بدفو الفنجان
ومن ريتك دخل الهيل بدلاله
ريكني برضابك طيب
انا مليت الكفار وخبزة انخاله
ريكيني ترف من كيمر الخدين
وحطلهن عسل من شفتك جماله
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة