وين الله وترد أمي
ثقافة شعبية
2019/11/19
![...](/uploads/posts/alsabaah-22863.jpg)
+A
-A
عمار الوائلي
درب طافح بواجي بخزرة الضويات
احلام شكثر مخطوفه بمرايات
خفاش الدمع بالليل
خفاش التعب بالحيل
ظنون امي حزن بين الوجوه يدور
اعاين عالنفس وأختل جنح عصفور
أجذب الخنگه بعيوني أرد اعله الثواني نذور
وأرسمهه الشمس لوحه ويضيع الحس
يتكسر ضوه الشميسه بالهندس
ياظلمة ، التبدت عالشمس سكته
بالطيره الحزن يرفس
وخوفي يهز ورگ روحي وأطيح أعله الجمر شمام
كل آه أنعصر وأشتاگ ،
أموت من الصدى اعله الجام
يغبش بالرمش ليلي
يغنيني الجمر دخان
الملامح ذبلت من الخوف عالشريان
روحي اطوف بالشريان
حزني يلون البيبان
اموتن نفس بالشيلة
بالثوب العطر مصلوب بالريه النفس فرعون
توج الطيره غربة نوم ،
كل سكرة نفس مجنون
ترف الطيره بالنسيان كلما ترجفلها جفوف
بالطيره الصبح مخطوف
وياچف اليغنيلك گمر والهم ، گلايد سود .؟
جزار الحزن بالعود .!!
الليل ، احمر سواده يعطش دموعي
الضوه ، بعيني رماد مشرعب جناحه
النهار ، ايعت حسرتي ويخطي مفتاحه
وين الله
وترد أمي
واطش الغيض بوجوه النسونه براي
وترد بوسة نده بالشوگ
وشكو بروحي صبح يطاير اعله الماي
وأصيح بصوت
العطش ملگه ، ضميره الموت
واسافر شايل الدمعة رسالة الكل ضحك مخمور
وياخذني الهوى عصفور
وترد امي ،
ويرد ظنها فرح بين الوجوه يدور
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة