(قلادة اضعها في جيد عروسة بلاد الشام دمشق الفاتنة)
ها..ياشام..
يا اول مدينة بصفحة التاريخ..
ويانجمة صبح وتشع عله الايام..
ويا اول اتراب اندفن بي (هابيل) ..
وياصخرة الوادي التهد اكبر هام..
واول ياسمينه انزرعت ابهل الكون..
ومنهه الجوري خضر صار( ورد الشام)..!
و( قاسيون ) ..
يا اجمل جبل يحمينه يوم الضيج..
قاسيون..عينه امفتحه ومتنام..
ويا اجمل قصيدة انكالت امن ازمان..
وصارت للشعر وهله نبع الهام..
ويااعذب نهر مايه زلال اجنان..
صافي واليشربه ما اظن ينضام..!
بارد( بردى) ايطفي لهيب الكيظ..ويخمد الجمر من تهب منه انسام..
هاي(المزه) و( المرجه) وهذاك السوك..
البي( بكداش) ينده: ياهلا يكرام..
(تكرم عينك) اتفضل تعال وشوف..
هاي(الحميديه) ..البيهه خاص وعام..
وهذا( الجامع ) وموضع( الراس) اهناك و( رقيه) الراقيه..اشويه امشي ليجدام..!
هذي الشام..حيوا الشام..!!
حيوا الشام..
بكل ستاتها.. ورجالها الشجعان..
الماتبرد عزايمهم..
ولاتنكسر عصتهم..
حي الله إرادتهم..
المن( يوسف ) و من( عدنان)..
هاي الشام..
هاي ام حضن دافي..اتهلي وتمرحب وتفتح للمحب بيبان..
جنة الخلد هيه انكول:
هذا( الكرز) ..ذاك الخوخ والرمان..
وهذي ريحة القداح والطيوب..
تعطر ادروبها وحاراتها امن ازمان..!
طيف الامس..بنت اليوم..
يانشوة الماضي التعط من كل خان..
يااحساس نشوتنا..
وياقنديل فرحتنا..
ويابلبل غنانه.. بدوحة البستان..
ويانجمة سمانه التضوي عتمتنا..
ويااكليل غار امرصع بمرجان..
و(ياسوك الحميديه) ..ياميزة دمشق الخالده..
الالهه صرت نيشان..!
اشما طالت الغيبه انردلج..
انردلج.. صوبشوك الطفل نحجيلج اللي كان والماكان..
ياسوك الحميديه.. كل ساعه تزف عريس..
وبابك تدك اطبول تعلن زفة العرسان..!
دمشق ياغادة الحسناء..
ياربة جمال الكون والالوان..
ياعشتارنا..
وفينوس..وافروديت ذاك العاش بـ(بلودان)..
الصاغلهن لحن(زرياب ) ابسحرهن ماغفت اجفان..
لا..لا..
مايطخ راسج..مهما جارت الايام..
لابد مافجر يبزغ ويكنس زمرة(الزعران)..!
وعلى حدج زمان الفات..
جثيره اتجندلت فرسان..!!
ياتؤم الروح..ويااخت بغداد..
انتي اوياهه صرتن للمجد عنوان..
اسمجن يشع مشعل نور..
ومثابه عاليه وعنوان..
ها يلشام..هايلشام..
ام المكرمات انتي ..من اول حرف مخطوط بيد انسان..
ها يلشام..هايلشام..
